Toshkent viloyatida oziq-ovqat mahsulotlari orasiga yashirilgan 95 mingdan ortiq dori vositasi topildi
Qiymati 1,3 milliard so‘m bo'lgan noqonuniy dori vositalari Qozog‘istondan olib kirilgan.
DXX Chegara qo‘shinlari harbiy xizmatchilari hamda bojxona organlari xodimlari hamkorligida o‘tkazilgan tezkor tadbir davomida xorijdan O‘zbekistonga noqonuniy olib kirilayotgan katta miqdordagi dori vositalari fosh etildi. Bu haqda DXX Zamon.uzga xabar berdi.
Ma’lum qilinishicha, Qozog‘istondan Toshkent viloyatining Qibray tumanida joylashgan “S. Najimov” chegara bojxona posti orqali kirib kelgan yuk avtomashinasi bojxona nazoratidan o‘tkazilgan. Farg‘ona viloyatining Oltiariq tumanida yashovchi, 1973-yilda tug‘ilgan fuqaro boshqaruvidagi mazkur transport vositasi tekshirilganda, oziq-ovqat mahsulotlari orasiga yashirilgan 52 turdagi jami 95 ming 369 dona tibbiy buyum va dori vositalari borligi aniqlangan.
Shundan so‘ng tezkor tadbir davom ettirilib, noqonuniy yuklarni qabul qilib olayotgan vaqtida Toshkent tumanida yashovchi, 1986-yilda tug‘ilgan shaxs ham ashyoviy dalillar bilan qo‘lga olingan.
Tegishli baholash xulosalariga ko‘ra, musodara qilingan tibbiy vositalarning umumiy qiymati 1 milliard 323 million so‘mni tashkil etadi.
Mazkur holat yuzasidan jinoyat ishi qo‘zg‘atilib, hozirda tergov harakatlari olib borilmoqda.
