Toshkentda YTH oqibatida 26 yoshli yigit halok bo‘ldi
Nexia-3 katta tezlikda kelib beton ustunga urilgan. Yo'lovchi vafot etgan, haydovchiga esa birinchi tibbiy yordam ko'rsatilgan.
Toshkent shahrining Sirg‘ali tumanida sodir bo‘lgan yo‘l-transport hodisasi oqibatida bir kishi vafot etdi. Bu haqda IIBB YHXB xabar berdi.
Ma’lum qilinishicha, hodisa 22-may kuni soat 13:00 lar atrofida Sergeli tumani Fayzli Toshkent ko‘chasidagi 60-uy qarshisida yuz bergan.
2001-yilda tug‘ilgan O.B. boshqaruvidagi Nexia-3 rusumli avtomobil katta tezlikda harakatlanayotib, haydovchi rul boshqaruvini yo‘qotgan va yo‘l chetidagi beton ustunga borib urilgan.
YTH oqibatida avtomobil yo‘lovchisi — 2000-yilda tug‘ilgan I.X. og‘ir tan jarohatlari olib, voqea joyida vafot etgan. Haydovchiga esa birinchi tibbiy yordam ko‘rsatilgan.
Mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
Toshkent shahar IIBB YHXB barcha haydovchi va yo‘l harakati qatnashchilarini yo‘l harakati qoidalariga qat’iy rioya qilishga chaqirdi hamda marhumning yaqinlariga hamdardlik bildirdi.
