Fransiya Isroil milliy xavfsizlik vaziriga mamlakatga kirishni taqiqladi

Fransiya Isroilning milliy xavfsizlik vaziri Itamar Ben-Gvirga mamlakat hududiga kirishni taqiqladi. Bunga “Global Sumud flotiliyasi” faollariga nisbatan qilgan masxaraomuz harakatlari sabab bo‘lgan. Bu haqda Al Jazeera xabar berdi.

 

Fransiya tashqi ishlar vaziri Jan-Noel Barroning ma’lum qilishicha, qaror Ben-Gvir tomonidan flotiliya ishtirokchilari — Fransiya va Yevropa fuqarolariga nisbatan “qabih munosabat” namoyish etilgani ortidan qabul qilingan.

 

"Bugundan boshlab Itamar Ben-Gvirga Fransiya hududiga kirish taqiqlandi", deya yozgan Barron.

 

Avvalroq Ben-Gvir ijtimoiy tarmoqlarda Ashdod portida ko‘zlari bog‘langan va qo‘llari kishanlangan holda tizzalab o‘tirgan faollar ustidan kulayotgan videosini e’lon qilgandi. Isroil harbiy-dengiz kuchlari bu hafta Kipr yaqinidagi xalqaro suvlarda flotiliya kemalarini to‘xtatib, qariyb 430 kishini qo‘lga olgan edi.

 

Faollarning pol bo‘ylab sudrab olib ketilgani aks etgan tasvirlar ortidan Fransiya, Italiya, Niderlandiya, Kanada va Ispaniya Isroil elchilarini chaqirib, hodisani qoraladi.

 

Barron Fransiya fuqarolarining tahdid va zo‘ravonlikka duchor etilishiga toqat qilib bo‘lmasligini bildirib, Yevropa Ittifoqini ham Ben-Gvirga qarshi sanksiyalar joriy etishga chaqirdi.

 

Avvalroq “Global Sumud flotiliyasi” tashkilotchilari Isroil hibsidan ozod etilgan faollar kamida 15 ta jinsiy zo‘ravonlik holati haqida ma’lum qilgandi. Ular orasida kamsituvchi tintuvlar, jinsiy tahqirlash va zo‘rlash holatlari borligi aytilmoqda.

 

BMT bu xabarlardan jiddiy xavotir bildirgan. Isroil qamoqxona xizmati esa barcha ayblovlarni rad etib, ularni “yolg‘on va asossiz” deb atagan.