“Ikki stul orasida o‘tirishga uringan odam qattiq yiqiladi”: Medvedev Pashinyanni ogohlantirdi

Rossiya Xavfsizlik kengashi raisi o‘rinbosari Dmitriy Medvedev Armaniston bosh vaziri Nikol Pashinyanning Yevropa Ittifoqi bilan yaqinlashuv siyosatini tanqid qilib, bu mamlakat uchun jiddiy oqibatlarga olib kelishi mumkinligini bildirdi. Bu haqda RBK yozmoqda.

 

Medvedevning fikricha, Yerevan bir vaqtning o‘zida ham Yevroosiyo iqtisodiy ittifoqidagi (YOII) imtiyozlarni saqlab qolish, ham Yevropa Ittifoqi bilan aloqalarni chuqurlashtirishga urinmoqda.

 

“Ikki stul orasida o‘tirishga urinayotgan odam qattiq yiqilishi mumkin”, — deb yozdi u “Maks” platformasidagi kanalida.

 

Rossiyalik siyosatchi Armaniston hukumati Rossiya gazining amaldagi narxlarini saqlab qolishga umid qilayotganini ham qayd etdi. Uning aytishicha, hozir Rossiya Armanistonga gazni ming kub metriga 177,5 dollardan yetkazib bermoqda, holbuki Yevropada 2026-yil may oyidagi birja narxlari 570–590 dollar atrofida bo‘lgan.

 

Medvedev Yevropa gaz narxlariga o‘tilsa, bu Armaniston ichida jiddiy norozilik keltirib chiqarishi mumkinligini ta’kidladi.

 

Avvalroq Rossiya Davlat dumasi spikeri Vyacheslav Volodin ham Pashinyan siyosatini “Rossiyaga nisbatan do‘stona bo‘lmagan siyosat” deb atagan edi. Unga ko‘ra, Moskva Armanistonga gazni o‘zi uchun zararli shartlarda yetkazib bermoqda.

 

So‘nggi oylarda Armaniston Yevropa Ittifoqi bilan yaqinlashuv siyosatini faollashtirdi. Mamlakat rasmiylari YIga a’zo bo‘lish istagini bildirgan, shuningdek, Kollektiv xavfsizlik shartnomasi tashkilotidagi ishtirokini to‘xtatgan.

 

5-may kuni Yerevanda Armaniston va Yevropa Ittifoqi o‘rtasidagi ilk ikki tomonlama sammit bo‘lib o‘tdi.

 

Aprel oyida Rossiya prezidenti Vladimir Putin Nikol Pashinyan bilan uchrashuvda Armaniston bir vaqtning o‘zida ham Yevropa Ittifoqi, ham Yevroosiyo iqtisodiy ittifoqi (YOII) doirasida to‘liq ishtirok eta olmasligini bildirgan.