O‘zbekiston va Qatar harbiy hamkorlik bo‘yicha memorandum imzoladi
Dohada ikki davlat mudofaa vazirlari oʻrtasida muzokaralar boʻlib oʻtdi.
Oʻzbekiston Respublikasi mudofaa vaziri general-leytenant Shuxrat Xalmuxamedov boshchiligidagi delegatsiya rasmiy tashrif bilan Doha shahrida boʻldi. Bu haqda vazirlik matbuot xizmati xabar berdi.
Tashrif doirasida Oʻzbekiston mudofaa vaziri Qatar Bosh vazir oʻrinbosari va mudofaa ishlari boʻyicha davlat vaziri Shayx Saud bin Abdulrahman bin Hassan Al Tani bilan uchrashuv oʻtkazdi.
Muloqot davomida mintaqadagi xavfsizlik sohasidagi soʻnggi vaziyat va dolzarb masalalar muhokama qilinib, mavjud sharoitlardan kelib chiqib harbiy hamkorlikni yanada rivojlantirish hamda qoʻshma muvofiqlashtirish yoʻnalishlari koʻrib chiqildi.
Uchrashuv yakunida Oʻzbekiston va Qatar oʻrtasida harbiy hamkorlik boʻyicha oʻzaro anglashuv memorandumi imzolandi.
