“Bunyodkor” stadioni atrofi muxlislar va mas’ul xodimlar bilan tozalandi
O‘zbekiston milliy terma jamoasi JCH-2026’ga tantanali kuzatilgach, stadion atrofidagi belgilanmagan joyga tashlab ketilgan chiqindilar yig'ildi.
“Bunyodkor” stadionida bo‘lib o‘tgan futbol bo‘yicha uchrashuvdan so‘ng chiqindilarni belgilangan joyga tashlash masalasi yana kun tartibiga chiqdi.
“Bunyodkor” stadionida O‘zbekiston milliy terma jamoasini 2026-yilfi jahon Chempionatiga kuzatish marosimi bo‘lib o‘tdi. Biroq futbolchilar tantanali kuzatilganidan so‘ng stadion atrofida chiqindilar qoldirilgani ma’lum bo‘ldi.
Chiqindilarni boshqarish va sirkulyar iqtisodiyotni rivojlantirish agentligining bildirishicha, futbol ishqibozlari va soha xodimlari stadion hududini chiqindilardan tozalash ishlarida ishtirok etgan.
Agentlik tomonidan e’lon qilingan videoda kimdir chiqindilarni tozalashga tezda kirishib ketgan bo‘lsa, yana kimdir vaqt kechib bo‘lib ketganini, uzoq joydan kelganini aytib yo‘lida davom etganini ko‘rish mumkin.
“Hurmatli futbol ixlosmandlari, aziz yurtdoshlar Vatan sha’ni va g‘alabasi deb yongan yuragingiz hamisha uning obodligi yo‘lida ham mas’ullikni sezib ursin”, deyiladi agentlik xabarida.
