Qirg‘izistonda Starlink rasman ishga tushdi
Avvalroq ushbu internet xizmati Qozog‘iston va Tojikistonda yo‘lga qo‘yilgandi.
Qirg‘izistonda Starlink sun’iy yo‘ldosh internet xizmati rasman ishga tushdi. 23-maydan boshlab mamlakat SpaceX kompaniyasining rasmiy xizmat xaritasida “Mavjud” hudud sifatida belgilangan. Bu haqda Kaktus.media nashri xabar berdi.
Endilikda foydalanuvchilar Starlink’ning rasmiy platformasi orqali o‘z hududlarida xizmat mavjudligini tekshirishi hamda internet xizmatiga ulanish uchun ariza topshirishi mumkin. Shuningdek, tizim orqali mavjud tarif rejalari va texnik imkoniyatlar haqida ma’lumot olish imkoniyati yaratilgan.
Qirg‘iziston hukumati avvalroq Starlink loyihasini ishga tushirish jarayoni yakuniy bosqichga yetganini ma’lum qilgan edi. Vazirlar Mahkamasi ma’lumotiga ko‘ra, loyiha uchun barcha zarur ruxsatnomalar olingan, SpaceX kompaniyasi tomonidan talab etilgan texnik va huquqiy shartlar bajarilgan hamda vakolatli davlat idoralari bilan tegishli shartnomalar imzolangan.
Rasmiylarning ta’kidlashicha, Starlink internetining joriy etilishi, ayniqsa, tog‘li va chekka hududlarda yashovchi aholini yuqori tezlikdagi internet bilan ta’minlashda muhim ahamiyat kasb etadi. Bundan tashqari, maktablar, tibbiyot muassasalari va boshqa ijtimoiy obyektlarni zamonaviy raqamli infratuzilmaga ulash imkoniyatlari kengayadi.
Starlink — SpaceX kompaniyasi tomonidan yaratilgan global sun’iy yo‘ldosh internet tizimi bo‘lib, past orbitali sun’iy yo‘ldoshlar tarmog‘i orqali internet xizmatini taqdim etadi. Mazkur texnologiya ayniqsa optik tolali yoki mobil aloqa infratuzilmasi rivojlanmagan hududlar uchun samarali yechim sifatida ko‘rilmoqda.
Tarmoq hozirda dunyoning 100 dan ortiq davlatida faoliyat yuritmoqda. Markaziy Osiyoda esa Starlink internetidan birinchi bo‘lib Qozog‘iston foydalana boshlagan, undan keyin Tojikiston ham ushbu tizimni joriy etgan edi. Qirg‘iziston esa endilikda ushbu texnologiyadan rasman foydalanayotgan navbatdagi mintaqa davlatiga aylandi.
