Navoiy aeroportida “porto-franko” erkin zonasi tashkil etiladi

Toshkent, Navoiy va boshqa hududlardagi aeroport infratuzilmasini modernizatsiya qilish bo‘yicha yirik transport loyihalari bosqichma-bosqich amalga oshirilmoqda. Bu haqda Prezident Shavkat Mirziyoyevga transport infratuzilmasini rivojlantirish yuzasidan taqdimot chog‘ida ma’lum qilindi.

 

Xususan, Yangi Toshkent xalqaro aeroporti loyihasi hududida muhandislik tarmoqlarini ko‘chirish ishlari boshlangan. Loyiha doirasida xalqaro moliya institutlari talablari asosida ekologik va ijtimoiy ta’sirni baholash ishlari yakunlangan. 

 

Hozirda hududda kanal, kollektor va elektr tarmoqlarini ko‘chirish jarayoni davom etmoqda, loyiha hamda pudrat tashkilotlari bilan muzokaralar olib borilmoqda.

 

Yangi aeroport yiliga 20 million yo‘lovchiga xizmat ko‘rsatish quvvatiga ega bo‘lishi rejalashtirilgan. Shuningdek, u 169 ta havo kemasi turargohi va har biri 4 kilometrdan iborat 2 ta uchish-qo‘nish yo‘lagi bilan jihozlanadi.

 

Hududiy aviatsiya infratuzilmasini rivojlantirish doirasida Navoiy xalqaro aeroportining tijorat mustaqilligi oshiriladi. Aeroportga mahalliy va xorijiy aviakompaniyalar bilan mustaqil shartnomalar tuzish huquqi berilgan. Shu bilan birga, uning hududida havo kemalariga texnik va tijorat xizmatlari ko‘rsatishga ixtisoslashgan “porto-franko” erkin zonasi tashkil etiladi.

 

Rejalarga ko‘ra, 2030-yilga borib Navoiy aeroportida parvozlar soni 2,3 barobar oshirilib, yiliga 7 ming reysga, yo‘lovchi tashish 150 ming nafarga, yuk tashish esa 45 ming tonnaga yetkaziladi.

 

Umuman olganda, mamlakat bo‘yicha 7 ta xalqaro aeroport rekonstruksiya qilinmoqda, shuningdek Mo‘ynoq, Qo‘qon, Zomin, Shahrisabz, Sariosiyo va So‘x tumanlarida yangi aeroportlar barpo etilib, ularning umumiy soni 18 taga yetkazilgan.

 

Aeroportlardagi yoqilg‘i ta’minoti tizimi ham modernizatsiya qilinadi. Yoqilg‘i quyish majmualarining umumiy sig‘imi 2030-yilga borib 49 ming tonnadan 80 ming tonnaga oshiriladi, mahalliy aviayoqilg‘i ishlab chiqarish esa yiliga 600 ming tonnaga yetkazilishi rejalashtirilgan.

 

Buning uchun Navoiy, Andijon, Buxoro, Urganch va Yangi Toshkent aeroportlarida yangi yoqilg‘i saqlash infratuzilmalari barpo etiladi. Yoqilg‘i saqlash va quyish jarayonlari bosqichma-bosqich xalqaro standartlarga o‘tkazilib, joriy yilda to‘liq raqamlashtiriladi hamda davlat nazorati kuchaytiriladi.

 

Taqdimotda ta’kidlanishicha, barcha transport loyihalarida iqtisodiy samaradorlik, qurilish sifati, xavfsizlik va yo‘lovchilar uchun qulaylik asosiy mezon bo‘lib qoladi.