Rossiya TIV xorijliklarni Kiyevni tark etishga chaqirdi
shuningdek, Ukraina poytaxti aholisi harbiy va ma’muriy infratuzilma obyektlariga yaqinlashmaslikka chaqirildi.
Rossiya Tashqi ishlar vazirligi xorijiy fuqarolar, diplomatik missiyalar hamda xalqaro tashkilotlar vakolatxonalari xodimlariga imkon qadar tezroq Kiyevni tark etishni tavsiya qildi.
Vazirlik bayonotida, shuningdek, Ukraina poytaxti aholisi Vladimir Zelenskiy ma’muriyatining harbiy va ma’muriy infratuzilma obyektlariga yaqinlashmaslikka chaqirilgan.
Rossiya TIV ma’lumotiga ko‘ra, Rossiya Qurolli Kuchlari Kiyevdagi Ukraina harbiy-sanoat majmuasi bilan bog‘liq obyektlarga tizimli zarbalar berishni boshlamoqda. Bayonotda NATO mutaxassislari ko‘magida foydalanilayotgan uchuvchisiz uchish apparatlarini loyihalash, ishlab chiqarish, dasturlash va qo‘llashga tayyorlash bilan bog‘liq obyektlar nishonga olinishi qayd etilgan.
Shuningdek, Rossiya tomoni NATO mutaxassislari dronlar uchun butlovchi qismlar yetkazib berish, razvedka ma’lumotlarini taqdim etish hamda nishonlarni belgilash bilan shug‘ullanayotganini ta’kidlagan.
“Zarbalar qarorlar qabul qilish markazlari va qo‘mondonlik punktlariga ham beriladi”, — deyiladi Rossiya TIV bayonotida.
Vazirlik ushbu obyektlar Kiyevning turli hududlarida joylashganini ma’lum qilgan.
Avvalroq Rossiya TIV Starobelskdagi teraktdan so‘ng Ukraina harbiy-sanoat majmuasi obyektlariga nisbatan tizimli zarbalar berilishi haqida ogohlantirgandi.
Eslatib o‘tamiz, Ukraina Qurolli kuchlarining LXR hududidagi Starobelsk shahrida joylashgan kollej binosiga bergan zarbasi oqibatida 21 kishi halok bo‘lgani xabar qilingan edi.
