Hindiston musulmonlariga Hayit namozini jamoat joylarida o‘qishni taqiqlamoqda

Hindistonning ayrim hududlarida musulmonlarning Qurbon hayiti namozlarini jamoat joylarida o‘qishiga nisbatan cheklovlar kuchaymoqda. Bu haqda Al Jazeera xabar berdi.

 

Ma’lum qilinishicha, Hindiston xalq partiyasi (BJP) boshqaruvidagi Uttar-Pradesh shtatida mahalliy hokimiyat va politsiya musulmonlarni ochiq maydonlarda namoz o‘qimaslikka chaqirmoqda. Masjid qo‘mitalari esa ibodat qiluvchilardan Hayit namozini navbat bilan o‘qish, masjid tashqarisida to‘planmaslik va namozdan so‘ng tezroq tarqalishni so‘ramoqda.

 

Al Jazeera’ning yozishicha, Merut tumanidagi ayrim masjidlarda Hayit oldidan maxsus yig‘ilishlar o‘tkazilib, odamlarga bahslashmaslik, video olmaslik va provokatsiyalarga javob qaytarmaslik bo‘yicha tavsiyalar berilgan.

 

Mahalliy musulmonlarning aytishicha, so‘nggi yillarda jamoat joylarida namoz o‘qish bilan bog‘liq bosim kuchaygan. Ayrim hollarda ochiq maydonlarda namoz o‘qigan fuqarolarga nisbatan ish qo‘zg‘atilgani, uylar buzilgani, haydovchilik guvohnomalari va pasport tekshiruvlari bilan bog‘liq muammolar yuzaga kelgani qayd etilgan.

 

Uttar-Pradesh bosh vaziri Yogi Adityanath 18-may kuni musulmonlar Hayit namozlarini “navbat bilan” o‘qishi kerakligini bildirgan.

 

U X ijtimoiy tarmog‘idagi sahifasida “Agar tinch yo‘l bilan rozi bo‘lishsa yaxshi, bo‘lmasa boshqa usulni qo‘llaymiz”, deb yozgan.

 

Shuningdek, BJP bilan yaqin aloqadagi o‘ng qanot hindu tashkiloti — Vishwa Hindu Parishad (VHP) mamlakat bo‘ylab yo‘llarda namoz o‘qishni to‘liq taqiqlashni talab qilgan. Tashkilot buni musulmonlarning “kuch namoyishi” deb baholagan.

 

Musulmon jamoalari esa ko‘plab masjidlar va Hayit namozlari uchun ajratilgan maydonlar barcha ibodat qiluvchilarni sig‘dira olmasligini ta’kidlamoqda. Shu sabab ayrim joylarda namoz qisqa muddatga ko‘chalarga chiqib ketishi odatiy hol ekani aytilgan.

 

Nashr suhbatlashgan musulmonlar hayit oldidan jamoada xavotir va bosim hissi kuchayganini bildirgan. Ularning aytishicha, odamlar politsiya reydlari, internetda tarqaladigan videolar yoki ijtimoiy tarmoqlardagi tanqidiy kampaniyalardan xavotir qilmoqda.

 

Al Jazeera qayd etishicha, shunga o‘xshash cheklovlar Dehli va boshqa BJP boshqaruvidagi hududlarda ham kuzatilmoqda. Ekspertlarga ko‘ra, musulmonlarning ommaviy diniy marosimlariga nisbatan nazorat kuchayishi Hindistonda diniy erkinlik va jamoat joylaridan foydalanish bilan bog‘liq bahslarni yanada keskinlashtirmoqda.