Mehmonxona va umumiy ovqatlanish joylarida alkogol va tamaki mahsulotlarini naqd pulga sotishga ruxsat berildi

O‘zbekistonda 1-iyundan boshlab mehmonxona va umumiy ovqatlanish shoxobchalarida alkogol hamda tamaki mahsulotlarini naqd pulga sotishga ruxsat beriladi. Bu Prezidentning 26-may kuni imzolangan “Kichik biznes subyektlarining o‘sishi uchun yanada qulay iqtisodiy va ma’muriy shart-sharoitlar yaratish to‘g‘risida”gi farmonida belgilandi.

 

Hujjatga ko‘ra, 2026-yil 1-iyundan mehmonxona va umumiy ovqatlanish xizmatlarini ko‘rsatuvchi tadbirkorlik subyektlari alkogol va tamaki mahsulotlarini sotishda naqd pul to‘lovlarini qabul qilishi mumkin bo‘ladi.

 

Shuningdek, alkogol mahsulotlari xarid qilinganda raqamli markirovka kodlari ushbu subyektlarda yakuniy iste’molga realizatsiya qilingan deb e’tirof etiladi.

 

Farmon bilan umumiy ovqatlanish korxonalari uchun bir qator tartiblar ham joriy etilmoqda. Xususan, ayrim toifadagi xodimlarni mehnat organlarining mobil ilovasi orqali soddalashtirilgan tarzda shu kunning o‘zida va muayyan muddatga ishga rasmiylashtirish hamda ish haqi to‘lash imkoniyati yaratiladi.

 

Bundan tashqari, to‘langan qo‘shilgan qiymat solig‘ining bir qismini qaytarish, tushumning naqdsiz shakldagi ulushidan qat’i nazar, to‘langan QQS summasining 40 foizi qaytariladi.

 

Umumiy ovqatlanish, savdo va xizmat ko‘rsatish faoliyati bilan tegishli bino va inshootlarga hamda yer uchastkalariga tutash hududlardan foydalanishda to‘lanadigan ijara to‘lovi miqdori Soliq kodeksida belgilangan tartibda aniqlanadigan yer soligining bir baravari miqdorida belgilanadi.

 

2027-yil 1-yanvardan boshlab:

 

• alkogol mahsulotlarini chakana sotish huquqi uchun hamda umumiy ovqatlanish korxonalari tomonidan alkogol mahsulotlarini realizatsiya qilish huquqi uchun yig‘imlar birlashtiriladi va uning stavkasi bazaviy hisoblash miqdorining 10 foizi miqdorida belgilanadi;
• jismoniy va yuridik shaxslar tomonidan tadbirkorlik subyektlariga umumiy maydoni 1000 metr kvadratdan ko‘p bo‘lgan mol-mulk ijaraga berilganda, soliq solish maqsadida ijara to‘lovining eng kam stavkalari qo‘llanmaydi, bundan Toshkent shahri mustasno;
• kichik biznes subyektlariga buxgalteriya hisobini yurituvchi tashkilotlar va soliq maslahatchilarini jalb qilish xarajatlarini ikki barobarga oshirgan holda chegirishga ruxsat beriladi.

 

Eslatib o‘tamiz, 1-apreldan ayrim tovar va xizmatlar uchun naqd pulda to‘lov qilish taqiqlangan edi. Ushbu cheklov alkogol va tamaki mahsulotlari, 25 million so‘mdan oshiq xaridlar hamda yoqilg‘i shoxobchalaridagi to‘lovlarga ham tatbiq qilingandi. 21-aprel kuni umumiy ovqatlanish sohasi tadbirkorlari bilan o‘tkazilgan ochiq muloqotda kafe, restoran va mehmonxonalarda alkogol mahsulotlari uchun faqat naqdsiz to‘lov talabi qayta ko‘rib chiqilishi ma’lum qilingandi.