O‘zbekistonda kitobxonlik tanlovi g‘oliblariga 50 ming dollargacha mukofot beriladi
Ishtirokchilar uchta yosh toifasida qatnashadi va belgilangan tartib asosida saralab olinadi.
O‘zbekistonda har yili milliy kitobxonlik harakati o‘tkazilib, g‘oliblarga yirik miqdorda pul mukofotlari topshiriladi. Bu Prezidentning “Yoshlar orasida kitobxonlik dasturini keng joriy etish va ularning qiziqishlarini qo‘llab-quvvatlash to‘g‘risida”gi farmoyishida belgilandi.
Hujjatga ko‘ra, 2026-yildan boshlab umumta’lim maktablari o‘quvchilari o‘rtasida kitob o‘qishga qiziqishni oshirishga qaratilgan milliy kitobxonlik harakati yo‘lga qo‘yiladi.
Dastur har yili uch bosqichda tashkil etiladi. Birinchi bosqich “kitobxonlikharakati.uz” elektron platformasi orqali onlayn tarzda o‘tkazilsa, ikkinchi va uchinchi bosqichlar viloyat hamda respublika darajasida an’anaviy formatda tashkil qilinadi.
Ishtirokchilar uchta yosh toifasida qatnashadi va belgilangan tartib asosida saralab olinadi.
Farmoyishga muvofiq, yuqori sinf toifalari — 6–8-sinf hamda 9–11-sinf o‘quvchilari orasida g‘olib va sovrindorlar pul mukofotlari bilan taqdirlanadi:
- 1-o‘rinni olgan 2 nafar g‘olibning har biri 50 ming AQSH dollari pul mukofoti va diplom;
- 2-o‘rinni olgan 2 nafar sovrindorning har biri 30 ming AQSH dollari pul mukofoti va diplom;
- 3-o‘rinni olgan 2 nafar sovrindorning har biri 15 ming AQSH dollari pul mukofoti va diplom;
- 5 ta qo‘shimcha nominatsiyalar bo‘yicha sovrindorlarning har biri 10 ming AQSH dollari pul mukofoti va diplom.
