Rossiyada bir qator muftiy va musulmon diniy arboblar qo‘lga olinmoqda
Mazkur jarayonlar Rossiya Musulmonlari diniy boshqarmasi hamda uning rahbari atrofidagi jarayonlar bilan bog‘lamoqda.
Rossiyaning turli hududlarida muftiylar va musulmon diniy-jamoat arboblarining qo‘lga olinishi hamda hibsga olinishi holatlari kuzatilmoqda. Ayrimlarga poraxo‘rlik, boshqalarga esa terrorchilik tashkilotlari bilan aloqadorlik bo‘yicha ayblovlar qo‘yilgan. Bu haqda Meduza yozmoqda.
Ma’lumotlarga ko‘ra, Mordoviya muftiysi Rail Asainov pora berishga urinishda gumon qilinib qo‘lga olingan. Tergov talqiniga ko‘ra, u universitet talabalarining sessiyani topshirishi uchun ta’lim muassasasi vakiliga pora taklif qilgan. Keyinchalik Asainov ozod etilgan. U bilan birga yana bir necha musulmon jamoasi faollari ham ushlangani aytilmoqda.
Moskvada esa Janubiy Butovo masjidi imomi, Kareliyaning sobiq muftiyi Visam Ali Bardvil 15 sutkaga ma’muriy qamoqqa olingan. U Sheremetyevo aeroportida politsiya talabiga bo‘ysunmaganlikda ayblanmoqda.
“Kommersant” nashrining yozishicha, may oyida “Musulmon birodarlar” tashkiloti faoliyatida ishtirok etganlik ayblovi bilan bir necha diniy arboblar va jamoatchilik vakillari hibsga olingan. Ular orasida “Shimoli-g‘arb musulmonlari hamjamiyati”ning sobiq rahbari Muhammad Xenni, Saratov viloyati muftiysi o‘rinbosari Nidal al Xixa hamda ingush ilohiyotchisi Ahmad Tangiyev bor. Qo‘lga olish ishlari Sankt-Peterburg, Saratov va Shimoliy Osetiyada o‘tkazilgani bildirilmoqda.
Ekspertlar va ayrim mustaqil OAV ushbu ishlarni Rossiya Musulmonlari diniy boshqarmasi (DUM) hamda uning rahbari muftiy Ravil Gaynutdin atrofidagi jarayonlar bilan bog‘lamoqda.
Siyosatshunos va islomshunoslar bu holatlarni diniy tuzilmalarga bosim kuchaygani bilan izohlamoqda.
Mutaxassislar qayd etishicha, DUM so‘nggi yillarda Rossiya hukumatiga sodiq pozitsiyada bo‘lish bilan birga, migrantlar huquqlari, masjidlar faoliyati va musulmonlarning diniy amaliyotlariga oid ayrim masalalarda mustaqil nuqtayi nazarni ham bildirib kelgan.
Shu bilan birga, ekspertlar terrorchilik tashkiloti bilan aloqadorlik haqidagi ayblovlarga ehtiyotkorona yondashmoqda. Ularning fikricha, bu kabi ishlar Rossiyadagi musulmon diniy tuzilmalari o‘rtasidagi ta’sir va nazorat masalalari bilan ham bog‘liq bo‘lishi mumkin.
Rossiya Musulmonlari diniy boshqarmasi hamda Muftiylar kengashi hozircha ushbu hibslar yuzasidan rasmiy bayonot bermagan.
