Sergeli avtomobil bozorida 100 nafar olib-sotarning faoliyatiga chek qo‘yildi

Toshkent shahridagi Sergeli avtomobil va ehtiyot qismlar bozorida o‘tkazilgan profilaktik tadbirlar davomida 100 nafar noqonuniy vositachi faoliyatiga chek qo‘yildi. Bu haqda Toshkent shahar IIBB xabar berdi.

 

Ma’lum qilinishicha, xalq orasida “saygak” yoki “olib-sotar” deb ataluvchi shaxslar xaridorlarga ehtiyot qismlarni arzon narxda va tezkor tarzda topib berishni va’da qilgan, biroq amalda mahsulotlarni bozor narxidan ikki-uch baravar qimmatga sotib kelgan.

 

IIBBga ko‘ra, bunday vositachilar faoliyati sifatsiz mahsulotlar savdosining ko‘payishiga, narxlarning sun’iy oshishiga hamda xaridorlarning bozorga bo‘lgan ishonchi pasayishiga sabab bo‘lmoqda.

 

O‘tkazilgan reydlar davomida bozorda noqonuniy faoliyat yuritayotgan va vositachilik bilan shug‘ullanayotgan 100 nafar shaxs aniqlanib, ular tuman ichki ishlar organlariga olib borilgan. Ulardan 50 nafari bilan profilaktik suhbat o‘tkazilgan, 30 nafariga nisbatan esa ma’muriy qamoq va jarima jazolari qo‘llanilgan.

 

IIBB ma’lumotlariga ko‘ra, 2025-yil va 2026-yilning o‘tgan davri davomida mazkur bozor hududida noqonuniy harakatlar bilan bog‘liq qariyb 10 ta jinoyat ishi aniqlangan.

 

Xususan, 2026-yil yanvar oyida fuqarolarga arzon avtomobil olib berishni va’da qilib, ularning mablag‘larini o‘zlashtirgan ikki shaxsga nisbatan sud hukmi chiqarilgan. Sud qarori bilan fuqaro Tojiboyev Jinoyat kodeksining 168-moddasi 4-qismi “a” bandi (juda ko‘p miqdordagi firibgarlik) bilan aybdor deb topilib, 9 yil muddatga ozodlikdan mahrum etilgan. Xuddi shu modda bilan ayblangan fuqaro Sherqobilov esa 8 yilga qamalgan.

 

IIBBning qayd etishicha, tadbirlardan so‘ng bozordagi vaziyat yaxshilangani, xaridorlar va tadbirkorlar tomonidan savdo jarayonlarida ochiqlik va shaffoflik kuchaygani ta’kidlangan.

 

Ichki ishlar organlari fuqarolarga mahsulot va xizmatlarni faqat rasmiy hamda ishonchli savdo nuqtalari orqali xarid qilishni tavsiya etdi.