Rossiya migrantlar nazoratini kuchaytirmoqchi
Rossiya IIV xorijiy davlatlarda migratsiyagacha tayyorgarlik markazlarini tashkil etib, migrantlarga mamlakatga kirishidan avval elektron identifikatsiya kartalarini berishni rejalashtirmoqda.
Rossiya Ichki ishlar vazirligi mehnat migrantlarini nazorat qilish tizimini kuchaytirish maqsadida migratsiya hablari tarmog‘ini yaratish va xorijiy fuqarolarga Rossiyaga kelishidan oldin identifikatsiya kartalarini berishni rejalashtirmoqda.Bu haqda Rossiya IIVning Fuqarolik va xorijiy fuqarolarni ro‘yxatga olish masalalari bo‘yicha xizmatining Migratsiya xavfsizligi departamenti boshlig‘i birinchi o‘rinbosari Aleksey Yegorov Xalqaro xavfsizlik forumida ma’lum qildi, deya xabar bermoqda TASS.
Yegorovning so‘zlariga ko‘ra, xorijiy fuqarolarni tekshirish Rossiya hududida tashkil etiladigan migratsiya hablarida ham, migrantlar kelayotgan mamlakatlardagi maxsus tayyorgarlik markazlarida ham amalga oshiriladi.
Yangi tizim doirasida migrantlarga elektron axborot tashuvchiga ega identifikatsiya kartalari berilishi ko‘zda tutilgan. Mazkur karta mehnat shartnomasini tuzish uchun asos bo‘lib xizmat qiladi hamda xorijiy fuqaro haqidagi to‘liq ma’lumotlarni, jumladan biometrik ma’lumotlarni ham o‘z ichiga oladi.
Rossiya IIV vakili ushbu chora-tadbirlar noqonuniy migratsiyani qisqartirish, mamlakat hududida noqonuniy yashayotgan xorijiy fuqarolar sonini kamaytirish va huquqbuzarliklar darajasini pasaytirishga qaratilganini ta’kidladi.
Shuningdek, vazirlik tashkil etilgan maqsadli tanlov asosida ishga jalb qilinadigan mehnat migrantlari ulushini oshirish hamda Rossiyaning “an’anaviy ma’naviy-axloqiy qadriyatlari”ni qo‘llab-quvvatlaydigan xorijiy fuqarolarni jalb etishga intilayotganini bildirdi.
