Namanganda qarz mojarosi sabab 21 yoshli yigit “samosud” qilindi
Yigitni urib-do‘pposlaganlarga nisbatan jinoyat ishi ochildi.
Namangan shahrida qarz masalasi yuzasidan kelib chiqqan mojaro oqibatida 21 yoshli yigit bir guruh shaxslar tomonidan kaltaklandi. Bu haqda Namangan IIB xabar berdi.
Viloyat Ichki ishlar boshqarmasi ma’lumotiga ko‘ra, voqea 31-may kuni Namangan shahrining “Dashtbog‘” mahallasi hududida sodir bo‘lgan.
Aniqlanishicha, Yangi Namangan tumanida yashovchi 1990-yilda tug‘ilgan N.X., 2000-yilda tug‘ilgan N.A., 2000-yilda tug‘ilgan O.A. hamda 2007-yilda tug‘ilgan A.A. Namangan shahrida yashovchi 2005-yilda tug‘ilgan I.A. bilan qarz masalasida tortishib qolgan.
Mojaro davomida ushbu shaxslar I.A.ni bir guruh bo‘lib urib-do‘pposlagan. Natijada jabrlanuvchiga yengil tan jarohati yetgan.
Tergovga qadar tekshiruv davomida hodisaning barcha ishtirokchilari aniqlangan.
Mazkur holat yuzasidan Namangan shahar IIB huzuridagi Tergov bo‘limi tomonidan N.X., N.A., O.A. va A.A.ga nisbatan Jinoyat kodeksining 277-moddasi 2-qismi “b” bandi (bir guruh shaxslar tomonidan sodir etilgan bezorilik) bilan jinoyat ishi qo‘zg‘atilgan.
Hozirda jinoyat ishi doirasida dastlabki tergov harakatlari olib borilmoqda.
