O‘zbekistonda 4 kun davomida sel-suv toshqini xavfi e’lon qilindi
Ayrim hududlarda kuchli yomg‘ir sabab yomg‘ir suvlari to‘planishi va hududlarni suv bosishi ehtimoli ham mavjudligi qayd etilgan.
“O‘zgidromet” 2–5 iyun kunlari respublikaning tog‘oldi va tog‘li hududlarida sel-suv toshqini xavfi yuzaga kelishi mumkinligi haqida ogohlantirdi.
Ma’lum qilinishicha, kutilayotgan yomg‘irlar sabab Qashqadaryo, Surxondaryo, Samarqand, Navoiy, Jizzax, Toshkent, Namangan, Farg‘ona va Andijon viloyatlarining ayrim tumanlarida sel-suv toshqini hodisalari kuzatilishi mumkin.
Xususan, Qashqadaryo viloyatining Yakkabog‘, Dehqonobod, Chiroqchi, Kitob, Shahrisabz, Qamashi va G‘uzor tumanlari, Surxondaryoning Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on hamda Muzrobot tumanlari xavfli hududlar qatoriga kiritilgan.
Shuningdek, Samarqand, Navoiy, Jizzax, Toshkent, Namangan, Farg‘ona va Andijon viloyatlarining qator tog‘oldi hamda tog‘li hududlarida ham sel kelishi ehtimoli mavjud.
“O‘zgidromet” tog‘oldi va tog‘li hududlarda yashovchi fuqarolar, dam oluvchilar hamda ushbu hududlarda harakatlanuvchi haydovchilardan ehtiyot choralarini ko‘rishni so‘radi.
Bundan tashqari, ayrim hududlarda kuchli yomg‘ir sabab yomg‘ir suvlari to‘planishi va hududlarni suv bosishi ehtimoli ham mavjudligi qayd etilgan.
