O‘zbekistonda chang-to‘zon va kuchli shamol bo‘yicha ogohlantirish berildi

 

Maxsus komissiya bugun respublika hududida, xususan, Toshkent shahri va bir qator viloyatlarda qisqa muddatli chang-to‘zon hodisalari kuzatilishi mumkinligi yuzasidan ogohlantirdi.

 

Jahon meteorologiya tashkilotining Chang-qum bo‘ronlari bo‘yicha Pekin mintaqaviy markazi hamda O‘zgidromet prognozlariga ko‘ra, Qoraqalpog‘iston Respublikasi, Buxoro, Navoiy, Toshkent, Jizzax, Sirdaryo va Surxondaryo viloyatlarida nam havo oqimlari kirib kelishi arafasida qisqa muddatli chang-to‘zonlar yuzaga kelishi ehtimoli mavjud.

 

Prognozlarga muvofiq, kun davomida ob-havo o‘zgaruvchan bo‘lib, ayrim hududlarda qisqa muddatli yomg‘ir va momaqaldiroq kuzatilishi kutilmoqda. Shamol tezligi 10–12 m/s gacha, ba’zi hududlarda esa 12–18 m/s gacha kuchayishi mumkin. Shamol kuchayishi fonida chang-to‘zonlar vaqtincha yuzaga kelishi ehtimoli bor.

 

Qayd etilishicha, mazkur jarayonlar natijasida atmosfera havosida, xususan PM10 chang zarrachalari miqdori qisqa muddatga ortishi mumkin. Biroq bu holat vaqtinchalik bo‘lib, kunning ikkinchi yarmida kutilayotgan qisqa muddatli yog‘ingarchilik hisobiga havo asta-sekin tozalanishi prognoz qilinmoqda.

 

Mutaxassislar shamol kuchaygan paytlarda, ayniqsa nafas yo‘llari kasalliklari, allergik va yurak-qon tomir xastaliklari mavjud fuqarolarga ehtiyot choralarini ko‘rishni tavsiya etadi. Zarurat bo‘lmaganda ochiq havoda uzoq vaqt bo‘lmaslik, deraza va eshiklarni yopiq saqlash hamda himoya niqoblaridan foydalanish tavsiya etiladi.

 

Hozirda atmosfera havosi holati Maxsus komissiya tomonidan doimiy monitoring qilinib, vaziyat nazorat ostida saqlanmoqda.