Ebola vaksinasini ishlab chiqish uchun 60 million dollar ajratiladi
Yangi Ebola shtammiga qarshi vaksina bo‘yicha klinik sinovlar yaqin oylarda boshlanishi mumkin.
Ebola virusining Bundibugyo shtammiga qarshi vaksina ishlab chiqishni tezlashtirish maqsadida Epidemiyalarga tayyorgarlik innovatsiyalari bo‘yicha global tashkilot (CEPI) tomonidan qariyb 60 million AQSh dollari miqdorida mablag‘ ajratiladi. Bu haqda Reuters xabar berdi.
Mazkur moliyalashtirish doirasida vaksina ishlab chiqish va klinik tadqiqotlarni jadallashtirish ishlari amalga oshiriladi. Mablag‘lar Moderna kompaniyasi, Oksford universiteti hamda Xalqaro OITSga qarshi vaksina tashabbusi (IAVI)ga yo‘naltiriladi.
CEPI rahbari Richard Xetchettning ma’lum qilishicha, vaksina ustidagi dastlabki sinovlar yaqin bir necha oy ichida boshlanishi mumkin. Shu bilan birga, u klinik jarayonlar murakkab bo‘lishi va xavfsizlik vaziyati tadqiqotlarga ta’sir ko‘rsatishi mumkinligini qayd etgan.
Hozircha Bundibugyo shtammi uchun tasdiqlangan vaksina yoki maxsus davolash usullari mavjud emas. Mutaxassislar yangi vaksina ishlab chiqilishi epidemiologik xavflarni kamaytirishda muhim ahamiyat kasb etishini ta’kidlamoqda.
Afrika Kasalliklarni nazorat qilish va profilaktika markazlari hamda Jahon sog‘liqni saqlash tashkiloti ma’lumotlariga ko‘ra, Kongo Demokratik Respublikasida 282 ta infeksiya holati qayd etilgan bo‘lib, ulardan 42 tasi o‘lim bilan yakunlangan. Ugandada esa 9 ta holat, jumladan 1 ta o‘lim qayd etilgan.
