Farg‘onada 2 kilogrammdan ortiq gashishni sotmoqchi bo'lgan shaxs ushlandi
Gumonlanuvchi ushbu giyohvandlik vositalarini Qirg‘iziston hududidagi jinoiy sherigidan qabul qilib olgan va ularni Qo‘qon shahrida sotishni rejalashtirgan.
Farg‘onada kontrabanda yo‘li bilan olib kirilgan giyohvandlik vositalari va kuchli ta’sir qiluvchi dori vositalarining noqonuniy aylanmasiga chek qo‘yildi. Bu haqda DXX Zamon.uz'ga xabar berdi.
Davlat xavfsizlik xizmati Farg‘ona viloyati boshqarmasi xodimlari tomonidan Ichki ishlar va Bojxona organlari bilan hamkorlikda o‘tkazilgan tezkor tadbir davomida Qo‘qon shahrida harakatlanayotgan, Farg‘ona tumanida yashovchi 1995-yilda tug‘ilgan fuqaro boshqaruvidagi “Damas” rusumli avtomobil to‘xtatilib, xolislar ishtirokida ko‘zdan kechirilgan.
Tekshiruv davomida transport vositasi salonidan jami 2 kilogramm 40 gramm “gashish” giyohvandlik moddasi hamda 5600 dona “Regapen” nomli kuchli ta’sir qiluvchi dori vositasi aniqlandi va belgilangan tartibda musodara qilingan.
Tergovga qadar o‘tkazilgan surishtiruvlarda aniqlanishicha, gumonlanuvchi ushbu giyohvandlik vositalarini Qirg‘iziston hududidagi jinoiy sherigidan qabul qilib olgan va ularni Qo‘qon shahrida sotishni rejalashtirgan.
Mazkur holat yuzasidan Davlat xavfsizlik xizmatining Farg‘ona viloyati boshqarmasi tomonidan fuqaro ustidan Jinoyat kodeksining 246-moddasi (kontrabanda), 251-1-moddasi hamda 273-moddalari bilan jinoyat ishi qo‘zg‘atilib, gumonlanuvchiga nisbatan “qamoq” ehtiyot chorasi qo‘llanilgan.
