Toshkentdan Issiqko‘lga avtobus qatnovlari 8-iyundan boshlanadi
Avtobuslar iyun oyining juft kunlarida Toshkentdan harakatlanadi, toq kunlarda Issiqko‘ldan qaytadi. Bir tomonlama chipta narxi 365 ming so‘m bo‘ladi.
2026- yil 8-iyunidan boshlab Toshkent va Qirg‘izistonning Issiqko‘l hududi o‘rtasida mavsumiy avtobus qatnovlari yo‘lga qo‘yiladi. Bu haqda Transport vazirligi xabar berdi.
Ma’lum qilinishicha, qatnovlar "Uzautotrans Service" MChJ tomonidan Toshkent – Cho‘lponota (Issiqko‘l) yo‘nalishi bo‘yicha amalga oshiriladi. Avtobuslar iyun oyining juft sanalarida Toshkentdagi “Toshkent” avtovokzalidan harakatlanadi, Issiqko‘ldan Toshkentga qaytish reyslari esa oyning toq kunlarida bajariladi.
Yo‘lovchilarga xizmat ko‘rsatish uchun Yutong rusumidagi avtobuslar jalb etiladi. Avtobus har kuni soat 15:00 da “Toshkent” avtovokzalidan jo‘nab ketadi.
Mazkur yo‘nalish bo‘yicha bir tomonlama chipta narxi 365 ming so‘m etib belgilangan.
Qo‘shimcha ma’lumotlarni +998 71 207-87-00, +998 94 131-99-99 hamda +998 88 666-15-15 telefon raqamlari orqali olish mumkin.
