AQSH 60 ta davlatga qo'shimcha bojlar joriy qilmoqchi

 

AQSh ma’muriyati 60 ta davlatdan import qilinadigan ayrim mahsulotlarga qo‘shimcha bojlar joriy etishni rejalashtirmoqda. Bu haqda Reuters agentligi xabar berdi.

 

Ma’lumotlarga ko‘ra, tashabbus ushbu mamlakatlarning majburiy mehnatga qarshi kurash borasidagi sa’y-harakatlari yetarli emasligi bilan izohlanmoqda. Vashington amaldagi savdo sharoitlari amerikalik ishlab chiqaruvchilar uchun teng raqobat muhitini ta’minlamayotganini ta’kidlamoqda.

 

AQSh Savdo vakili idorasi tomonidan tayyorlangan taklifga muvofiq, Kanada, Meksika hamda Yevropa Ittifoqining ayrim davlatlarini o‘z ichiga olgan 15 mamlakat mahsulotlariga 10 foizlik qo‘shimcha boj joriy etilishi mumkin. Tekshiruv ostidagi yana 45 davlat uchun esa tariflar 12,5 foizgacha oshirilishi rejalashtirilgan.

 

AQSh savdo vakili Jeymison Grinning ta’kidlashicha, hozirgi import tizimi amerikalik ishchilarni global bozorda teng bo‘lmagan sharoitlarda raqobat qilishga majbur qilmoqda.

 

Shuningdek, ayrim to‘qimachilik mahsulotlarini imtiyozli tariflar asosida import qilish mexanizmi ham taklif etilgan. Biroq ushbu tashabbusning aniq tafsilotlari hozircha ochiqlanmagan.

 

Taklif etilayotgan bojlar energiya resurslari, metallar, mol go‘shti, qahva va farmatsevtika mahsulotlariga tatbiq etilmaydi. Mazkur tashabbus bo‘yicha jamoatchilik muhokamalari 7-iyul kuni o‘tkazilishi rejalashtirilgan bo‘lib, taklif va mulohazalar 6-iyulgacha qabul qilinadi.