Soliq qo‘mitasi va “O‘zbekneftgaz”ga aloqador yirik talon-torojlik: byudjetdan 643,2 mlrd so‘m o'zlashtirildi
Sho‘rtan gaz-kimyo majmuasi loyihasi doirasida QQSdan ozod etilgan xizmatlar uchun elektron hisob-fakturalarga noqonuniy ravishda QQS summalari kiritilgan.
Bosh prokuratura huzuridagi Departament hamda Soliq qo‘mitasining komplayens va korrupsiyaga qarshi nazorat boshqarmasi hamkorligida o‘tkazilgan tergovga qadar tekshiruvlar davomida 643,2 milliard so‘mlik byudjet mablag‘larini talon-toroj qilish bilan bog‘liq holat fosh etildi.
Bosh prokuratura huzuridagi departamentning ma'lum qilichicha, Soliq qo‘mitasi, Buxoro viloyati soliq boshqarmasi, “O‘zbekneftgaz” AJ hamda bir qator xo‘jalik yurituvchi subyektlar mansabdor shaxslari o‘zaro til biriktirib, Sho‘rtan gaz-kimyo majmuasining ishlab chiqarish quvvatlarini kengaytirish loyihasi doirasida ko‘rsatilgan xizmatlar uchun noqonuniy ravishda qo‘shilgan qiymat solig‘i (QQS) summalarini elektron hisob-fakturalarga kiritgan.
Ammo, mazkur loyiha bo‘yicha 5,3 trillion so‘mlik xizmatlar amaldagi qonunchilikka muvofiq QQSdan ozod etilgan. Shunga qaramay, noqonuniy ravishda shakllantirilgan QQS mablag‘lari ayrim korxonalar hisob raqamlariga qaytarilishiga hamda davlat oldidagi qarzdorliklarning yopilishiga erishilgan.
Oqibatda davlat byudjetiga tegishli 643,2 milliard so‘m mablag‘ o‘zlashtirish va rastrata qilish yo‘li bilan talon-toroj qilingani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilgan bo‘lib, hozirda tergov harakatlari davom ettirilmoqda.
