AQSh Eron bilan sulhdan voz kechishi mumkin — WSJ
Tramp amerikalik harbiylar halok bo‘lsa, Eronga qarshi harbiy amaliyotlarni qayta boshlashi mumkinligini ma’lum qildi.
AQSh prezidenti Donald Tramp Eron bilan tuzilgan sulhga qaramay, agar Tehron harakatlari oqibatida amerikalik harbiylar halok bo‘lsa, harbiy amaliyotlarni qayta boshlash ehtimolini ko‘rib chiqishga tayyorligini bildirgan. Bu haqda The Wall Street Journal AQSh rasmiylariga tayanib xabar berdi.
Nashr ma’lumotlariga ko‘ra, Tramp ushbu pozitsiyasini yordamchilari bilan yopiq uchrashuvlarda muhokama qilgan. Unga ko‘ra, AQSh harbiy xizmatchilarining o‘limiga olib keladigan har qanday harakat Vashingtonning sulh bo‘yicha qarorlarini qayta ko‘rib chiqishiga sabab bo‘lishi mumkin.
Shu bilan birga, manbalarning ta’kidlashicha, Oq uy hozircha Eronga qarshi havo hujumlarini to‘xtatish haqidagi qarorida qat’iy qolmoqda.
WSJ qayd etishicha, Tramp ma’muriyati Yaqin Sharqdagi mojaroni yanada kengaytirib yubormaslik maqsadida ayrim cheklangan keskinliklarga ma’lum muddat davomida toqat qilishga tayyor.
Avvalroq AQSh prezidenti Vashington va Tehron o‘rtasidagi muzokaralar ijobiy ruhda davom etayotganini, yaqin haftalarda muayyan kelishuvlarga erishish ehtimoli mavjudligini bildirgan edi.
