Toshkentdagi avtobusda uyatsiz harakatlar qilgan erkak 15 sutkaga qamaldi
U jamoat joyida bo‘la turib, jamiyatda yurish-turish qoidalarini qasddan mensimasdan, axloq va odob me’yorlariga zid harakatlarni sodir etgan.
Ijtimoiy tarmoqlarda avtobus salonida noma’lum erkak kishining jamiyatda yurish-turish qoidalarini buzganligini aks etgan video tarqalib, turli muhokamalarga sabab bo‘ldi. Ushbu holat yuzasidan huquqni muhofaza qiluvchi organlar tomonidan tegishli choralar ko‘rilgan. Bu haqda Toshkent shahar IIBB matbuot xizmati xabar berdi.
Ma’lum qilinishicha, joriy yilning 3-iyun kuni soat 09:45 atrofida 42-yo‘nalishda harakatlanayotgan avtobus salonida 1978-yilda tug‘ilgan T.S. jamoat joyida bo‘la turib, jamiyatda yurish-turish qoidalarini qasddan mensimasdan, axloq va odob me’yorlariga zid harakatlarni sodir etgan.
Holat yuzasidan ko‘rilgan tezkor choralar natijasida mazkur fuqaro ichki ishlar organlari xodimlari tomonidan aniqlanib, ushlangan.
Olmazor tumani Ichki ishlar organlari faoliyatini muvofiqlashtirish boshqarmasi tomonidan fuqaro T.S.ga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) hamda 194-moddasi (ichki ishlar organlari xodimining qonuniy talablarini bajarmaslik) alomatlari bilan ma’muriy bayonnoma rasmiylashtirilgan.
To‘plangan hujjatlar Jinoyat ishlari bo‘yicha Olmazor tuman sudiga yuborilgan. Sud qaroriga ko‘ra, ushbu shaxsga nisbatan 15 sutka ma’muriy qamoq jazosi tayinlangan.
