Zelenskiy bilan uchrashidan ma’no ko‘rmayapman — Putin
Putin Zelenskiyning maktubi ayrim jihatlari bilan qo‘pol ohangda yozilganini va uni samimiy muzokara taklifi sifatida qabul qilmaganini aytdi.
Rossiya prezidenti Vladimir Putin Ukraina prezidenti Volodimir Zelenskyy tomonidan urushni yakunlash masalasini muhokama qilish uchun yuzma-yuz uchrashuv o‘tkazish taklifi bildirilgan ochiq maktubga munosabat bildirib, hozircha bunday uchrashuv uchun asos ko‘rmayotganini ma’lum qildi. Bu haqda Reuters xabar berdi.
Ma'lum qilinishicha, Putin Rossiyaning yillik iqtisodiy forumidagi chiqishi chog‘ida Zelenskiyning maktubi ayrim jihatlari bilan qo‘pol ohangda yozilganini va uni samimiy muzokara taklifi sifatida qabul qilmaganini aytdi.
Rossiya rahbarining ta’kidlashicha, maktubdagi ayrim iboralar yuzma-yuz muloqot uchun sharoit yaratishga emas, aksincha, bunday uchrashuvning amalga oshmasligiga xizmat qilgandek taassurot uyg‘otgan.
Rossiyaning yillik iqtisodiy forumida sahnada turib jurnalistlarning Zelenskiy bilan uchrashish ehtimoli haqidagi savoliga javoban Putin:
“Men hozircha buning hech qanday ma’nosini ko‘rmayapman”, — dedi.
Bir kun avval xalqaro ommaviy axborot vositalari vakillari bilan uchrashuvda Rossiya prezidenti Ukrainadagi urush yuzasidan o‘zining qat’iy pozitsiyasini yana bir bor takrorladi. Uning so‘zlariga ko‘ra, Rossiya qo‘shinlari front chizig‘ida har kuni oldinga siljimoqda.
Shu bilan birga, Putin AQSh prezidenti Donald Tramp tomonidan ilgari surilgan tinchlik tashabbuslari Kiyev murosaga tayyor bo‘lgan taqdirda harbiy harakatlarni to‘xtatishga xizmat qilishi mumkinligini qayd etdi.
Rossiya va Ukraina esa bir-birini mojaroni diplomatik yo‘l bilan hal etish uchun zarur bo‘lgan murosaga tayyor emaslikda ayblab kelmoqda.
Nashr qayd etishicha, Rossiyadagi ayrim millatchi guruhlar va sharhlovchilar Zelenskiyning ochiq maktubini urushni tugatishga qaratilgan tashabbus emas, balki Rossiya ichida norozilik kayfiyatini kuchaytirishga qaratilgan siyosiy va axborot kampaniyasi sifatida baholadi.
Zelenskiyning ochiq maktubi va Putinning unga bergan javobi Rossiya-Ukraina urushini diplomatik yo‘l bilan hal etish istiqbollari yuzasidan muhokamalar davom etayotgan bir paytda e’lon qilindi.
