Jizzaxda harakatlanayotgan yuk mashinasi yonib ketdi
Hozirda yong‘in sababi va zarari aniqlanmoqda.
Bugun, 6-iyun kuni Jizzax viloyatining G‘allaorol tumanida harakatlanib ketayotgan yuk avtomobilida yong‘in sodir bo‘ldi.
Viloyat Favqulodda vaziyatlar boshqarmasi ma’lumotiga ko‘ra, hodisa soat 06:39 da M-39 xalqaro avtomobil yo‘lining G‘allaorol tumani “Xonimqo‘rg‘on” mahalla fuqarolar yig‘ini hududidan o‘tuvchi 1027-kilometrida qayd etilgan. Samarqand–Toshkent yo‘nalishida harakatlanayotgan yuk avtomobili texnik nosozlik yoki boshqa sabablar oqibatida yonib ketgan.
Voqea joyiga 2 ta yong‘in-qutqaruv ekipaji jalb etilib, ular soat 07:10 da yetib borgan. Tezkor harakatlar natijasida yong‘in soat 07:48 da to‘liq bartaraf etilgan.
Dastlabki ma’lumotlarga ko‘ra, hodisa oqibatida tan jarohati olganlar yo‘q. Hozirda yong‘inning kelib chiqish sabablari hamda yetkazilgan moddiy zarar miqdori aniqlanmoqda.
Eslatib o'tamiz, avvalroq Toshkent viloyatida konditsioner ortilgan yuk mashinasi yonib ketgani xabar qilingan edi.
