Navoiyda alimentdan qarzdor ota tandir ichidan topildi
Uning qarzdorligi qariyb 71 million so‘mni tashkil etgan.
Navoiy viloyatining Karmana tumanida aliment to‘lovlarini uzoq muddat davomida to‘lamasdan kelgan fuqaro Majburiy ijro byurosi xodimlari tomonidan qo‘lga olindi. Bu haqda Navoiy viloyat sudi matbuot xizmati xabar berdi.
Ma’lum qilinishicha, fuqaroning aliment bo‘yicha qarzdorligi qariyb 71 million so‘mni tashkil etgan. U ikki yil davomida sud qarori bilan belgilangan majburiyatlarini bajarmasdan, aliment to‘lovlaridan bo‘yin tovlab kelgan.
Qidiruv tadbirlari davomida Majburiy ijro byurosi xodimlari qarzdorni yashash manzilida aniqlagan. Tekshiruv jarayonida fuqaro uy hovlisidagi yozgi oshxonada joylashgan tandir ichida yashiringani ma’lum bo‘lgan.
Ko‘rilgan choralar natijasida qarzdor ushlanib, qonunchilikda belgilangan tartibda javobgarlikka tortilgan. Sud qaroriga asosan unga nisbatan 15 sutka ma’muriy qamoq jazosi tayinlangan.
