Surxondaryoda 4 ming dollarga IJQKDga ishga kiritib qo‘yishni va’da qilgan shaxs ushlandi
U yuqori lavozimlarda ishlovchi tanishlari orqali fuqaroni ishga joylamoqchi bo‘lgan.
Surxondaryo viloyatida fuqaroni Bosh prokuratura huzuridagi Iqtisodiy jinoyatlarga qarshi kurashish departamentiga ishga joylashtirib qo‘yishni va’da qilib, pul olgan shaxs qo‘lga olindi. Bu haqda IJQKD xabar berdi.
Bosh prokuratura huzuridagi Departamentning Shaxsiy xavfsizlik boshqarmasi hamda Surxondaryo viloyati boshqarmasi xodimlari hamkorligida o‘tkazilgan tezkor tadbirda fuqaro B.L.ning noqonuniy harakatlariga chek qo‘yildi.
Tergovga qadar tekshiruv materiallariga ko‘ra, u fuqaro S.N.ga yuqori lavozimlarda ishlovchi tanishlari orqali uni Bosh prokuratura huzuridagi Iqtisodiy jinoyatlarga qarshi kurashish departamentiga ishga kiritib qo‘yishni va’da qilgan. Buning evaziga 4 ming AQSH dollari talab qilgan.
Tezkor tadbir davomida B.L. kelishilgan pullar hisobidan 48 million so‘mni olayotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining tegishli moddalari asosida jinoyat ishi qo‘zg‘atilib, dastlabki tergov harakatlari olib borilmoqda.
