AQSHda mahkumlar qatl etilishi mumkin

AQSH armiyasi “Qat’iy adolat” (Operation Resolute Justice) deb nomlangan maxsus reja doirasida harbiy sudlar tomonidan o‘lim jazosiga hukm qilingan mahkumlarni qatl etish jarayoniga tayyorgarlik ko‘rmoqda.

 

ABC News ma’lumotlariga ko‘ra, reja mahkumlarni Kanzas shtatidagi Fort-Levenvort harbiy qamoqxonasidan Indiana shtatining Terre-Hot shahridagi federal qatl muassasasiga ko‘chirishni nazarda tutadi. Hujjatda AQSh Prezidenti tomonidan o‘lim jazolari tasdiqlanganidan so‘ng ularni ijro etish uchun zarur tashkiliy choralar ko‘rish belgilangan.

 

AQSH qonunchiligiga muvofiq, harbiy sudlar o‘lim jazosini tayinlashi mumkin, biroq hukm faqat prezidentning alohida tasdig‘idan keyin ijro etiladi.

 

Nashrning yozishicha, agar Donald Tramp tegishli qarorni qabul qilsa, bu AQSH harbiy tizimi tomonidan 1961-yildan buyon amalga oshiriladigan ilk qatl bo‘ladi. Mamlakat tarixidagi so‘nggi harbiy qatl aynan o‘sha yili amalga oshirilgan.

 

Joriy yil aprel oyida AQSH Adliya vazirligi federal darajadagi o‘lim jazosini qo‘llash amaliyotini tiklashga qaratilgan bir qator choralarni e’lon qilgan edi. Ular orasida o‘limga olib keluvchi inyeksiya protokolini qayta joriy etish va ayrim hollarda otib tashlash usulidan foydalanish imkoniyatini kengaytirish ham bor.

 

Shuningdek, bu qarorlar sobiq prezident Jo Bayden ma’muriyati davrida amalda bo‘lgan federal qatl bo‘yicha moratoriy bekor qilinganidan keyin qabul qilingan.

 

Eslatib o‘tamiz, Donald Tramp 2024-yilgi saylovoldi kampaniyasi davomida AQSH fuqarolarini o‘ldirgan muhojirlarga nisbatan o‘lim jazosini qo‘llash tashabbusini ilgari surgan edi.