Andijonda voyaga yetmagan qizni zo‘rlagan IIB xodimi ushlandi
IIBning voyaga yetmaganlar masalalari bo‘yicha inspektori 16 yoshli qiz bilan jinsiy aloqada bo‘lgani aniqlangan.
Andijonda IIB xodimi voyaga yetmagan shaxsga nisbatan jinsiy jinoyat sodir etgani aniqlandi. Bu haqda viloyat prokuraturasi xabar berdi.
Ma’lum qilinishicha, Qo‘rg‘ontepa tumani prokuraturasi tomonidan 2010-yilda tug‘ilgan voyaga yetmagan qizning 3-iyun kuni yashash manzilidan chiqib ketib, qaytib kelmagani yuzasidan tergovga qadar tekshiruv harakatlari o‘tkazilgan.
Tekshiruv davomida Andijon viloyat IIB voyaga yetmaganlarga ijtimoiy-huquqiy yordam ko‘rsatish markazi inspektori-ijtimoiy xodimi lavozimida ishlagan S.B voyaga yetmagan qizni Andijon shahridagi ko‘p qavatli uyga olib borib, u bilan jinsiy aloqada bo‘lgani aniqlangan.
Mazkur holat yuzasidan joriy yilning 4-iyun kuni S.Bga nisbatan O‘zbekiston Respublikasi Jinoyat kodeksining 128-moddasi 3-qismi “v” bandi bilan jinoyat ishi qo‘zg‘atilib, sudning tegishli ajrimi bilan gumonlanuvchi tariqasida “qamoq” ehtiyot chorasi qo‘llanilgan.
Hozirda mazkur holat yuzasidan Qo‘rg‘ontepa tuman prokuraturasi tomonidan dastlabki tergov harakatlari olib borilmoqda.
Qayd etilishicha, tergov harakatlarining borishi viloyat prokuraturasi tomonidan nazoratga olingan bo‘lib, yakunda qonuniy qaror qabul qilinishi ta’minlanadi.
