Elektron ko‘targichlar nima uchun ishlamayapti? — Metropoliten javob berdi
Ijtimoiy tarmoqlarda metro bekatlaridagi elektron panduslar ishlamayotgani va noqulayliklar borligi haqida xabarlar tarqaldi.
Ijtimoiy tarmoqlarda metro bekatlarining kirish va chiqish qismlarida o‘rnatilgan elektron ko‘targich qurilmalari (panduslar) ishlamayotgani hamda ulardan foydalanishda ayrim noqulayliklar mavjudligi haqida xabarlar tarqaldi. Mazkur holat yuzasidan “Toshkent metropoliteni” rasmiy izoh berdi.
Qayd etilishicha, so‘nggi yillarda Toshkent metrosidan foydalanuvchilar soni sezilarli darajada oshgani sababli harakatlanishda imkoniyati cheklangan shaxslar va keksa yo‘lovchilar uchun qulay sharoit yaratish maqsadida metro bekatlarida zamonaviy elektron ko‘targich panduslari o‘rnatilmoqda.
Mazkur loyiha Toshkent shahar hokimligining “Yagona buyurtmachi xizmati” injiniring kompaniyasi buyurtmasi asosida amalga oshirilmoqda. Qurilish-montaj ishlari esa “Texnopark” MCHJ tomonidan bajarilmoqda.
Hozirda ushbu panduslarni o‘rnatish, sozlash va sinovdan o‘tkazish jarayonlari davom etmoqda. Shu sababli qurilmalar hali to‘liq ishga tushirilmagan.
Metropoliten ma’lumotiga ko‘ra, panduslarni tez va sifatli yakunlash bo‘yicha mas’ul tashkilotlarga bir necha bor rasmiy murojaatlar yuborilgan. Shuningdek, bu masala Toshkent shahar hokimligida o‘tkazilgan yig‘ilishda ham ko‘rib chiqilib, tegishli topshiriqlar berilgan.
Ta’kidlanishicha, elektron panduslar hozircha “Toshkent metropoliteni” balansiga qabul qilinmagan bo‘lib, barcha texnik va qabul qilish jarayonlari yakunlangachgina ular korxona tasarrufiga o‘tkazilishi rejalashtirilgan.
Shuningdek, har bir pandus yonida undan foydalanish tartibi bo‘yicha yo‘riqnomalar o‘rnatilayotgani ma’lum qilingan.
