Eron, Iroq va Suriya ustidan havo qatnovi to‘xtatildi
Mintaqada xavfsizlik sababli parvozlar keskin cheklangan.
Flightradar24 ma’lumotlariga ko‘ra, Eron, Iroq va Suriya havo hududida fuqarolik aviatsiyasi harakati deyarli to‘liq to‘xtagan. Mintaqa osmoni samolyotlardan bo‘shab qolgan.
Qayd etilishicha, hozirda ushbu uch davlat ustida muntazam yo‘lovchi parvozlari amalga oshirilmayapti. Ayrim ma’lumotlarga ko‘ra, xavfsizlik sababli havo hududi vaqtincha yopilgan.
Shu bilan birga, Isroildan uchta fuqarolik samolyoti uchib ketayotgani kuzatilgan. Flightradar24 kuzatuvlariga ko‘ra, yana bir ichki reys Hayfa–Eylat yo‘nalishida harakatlanmoqda, biroq mintaqadagi havo harakati keskin cheklangan.
Iroq rasmiylari avvalroq havo hududini 72 soatga yopganini ma’lum qilgan. Suriya esa Damashq aeroporti va janubiy havo hududini vaqtincha yopganini bildirgan.
Mutaxassislar fikricha, mazkur cheklovlar mintaqadagi xavfsizlik vaziyatining keskinlashuvi bilan bog‘liq.
