Nurafshon shahar hokimi Ilhom Qilichxonov lavozimidan ozod etildi

 

Toshkent viloyati Nurafshon shahri hokimi Ilhom Qilichxonov egallab turgan lavozimidan ozod etildi. Bu haqda viloyat hokimligi matbuot xizmati ma’lum qildi.

 

Qayd etilishicha, Ilhom Qilichxonov faoliyatini boshqa lavozimda davom ettiradi. Ma’lum qilinishicha, 8-iyun kuni Toshkent viloyatida bir qator tashkiliy masalalar ko‘rib chiqilishi rejalashtirilgan.

 

Ilhom Qilichxonov 2023-yil aprel oyidan buyon Nurafshon shahri hokimi sifatida faoliyat yuritib kelayotgandi. U mazkur lavozimga tayinlanishidan avval Qurilish va uy-joy kommunal xo‘jaligi sohasida nazorat qilish inspeksiyasi boshlig‘i o‘rinbosari lavozimida ishlagan.

 

Eslatib o‘tamiz, joriy yil 24-aprel kuni Prezident Shavkat Mirziyoyev raisligida o‘tkazilgan videoselektor yig‘ilishida Nurafshon shahri, G‘uzor, Narpay, Urganch, Yangiyo‘l va Chinoz tumanlari rahbarlarining lavozimiga loyiqligini qayta ko‘rib chiqish topshirilgandi.

 

Mazkur yig‘ilishda Nurafshon shahar hokimi faoliyati ham tanqid ostiga olingan edi. Xususan, ikki yildan buyon qurilish ishlarini boshlay olmayotgan tadbirkor muammosini hal etish o‘rniga, masalaning qanday qilib Prezident darajasigacha yetib borgani bilan qiziqayotgani qayd etilgandi.