Pashinyan saylovda g‘alaba qozondi
Armanistondagi parlament saylovlarida Pashinyan partiyasi 50,07 foiz ovoz to‘plab, yetakchilik mavqeini saqlab qoldi.
Armanistonda bo‘lib o‘tgan parlament saylovlarining dastlabki natijalariga ko‘ra, Bosh vazir Nikol Pashinyan boshchiligidagi “Fuqarolik shartnomasi” partiyasi eng ko‘p ovoz to‘pladi. Bu haqda NEW.am nashri xabar berdi.
Markaziy saylov komissiyasi ma’lumotlariga ko‘ra, byulletenlarning 94 foizi qayta ishlangach, hukmron siyosiy kuch 50,07 foiz ovoz bilan birinchi o‘rinni egallagan.
Ikkinchi o‘rinda milliarder Samvel Karapetyan yetakchiligidagi “Kuchli Armaniston” ittifoqi 23,35 foiz ovoz bilan qayd etilgan.
Uchinchi natijani esa Armanistonning sobiq prezidenti Robert Kocharyan boshchiligidagi “Armaniston” bloki ko‘rsatib, saylovchilarning 9,96 foiz qo‘lloviga erishgan.
Shuningdek, “Gullab-yashnayotgan Armaniston” partiyasi 3,99 foiz, “Birlik qanotlari” partiyasi esa 2,28 foiz ovoz to‘plagan.
Dastlabki natijalarga ko‘ra, yangi parlament tarkibida uchta siyosiy kuch — “Fuqarolik shartnomasi”, “Kuchli Armaniston” va “Armaniston” bloklari vakillik qilishi kutilmoqda.
Ma’lumot uchun, 7-iyun kuni bo‘lib o‘tgan parlament saylovlarida jami 18 ta siyosiy partiya va blok ishtirok etgan. Qonunchilikka ko‘ra, partiyalar uchun saylov to‘sig‘i 4 foiz, bloklar uchun esa ularning tarkibiga qarab 8–10 foiz etib belgilangan.
