Sergeli avtomobil bozorida noqonuniy savdo bilan shug‘ullangan shaxslarning suratlari ilib qo‘yildi
Ushbu bozorda 100 nafar “saygak”ning faoliyatiga chek qo‘yilgandi.
Sergeli avtomobil bozori hududida ogohlantiruvchi stend o‘rnatilib, unga noqonuniy savdo bilan shug‘ullangani aytilayotgan 40 nafar shaxsning fotosurati joylashtirildi. Ulardan 39 nafari erkak, 1 nafari ayol kishi. Har bir surat tagida fuqaroning ism-familiyasi va tug‘ilgan yili aniq ko‘rsatilgan.
Bozor ma’muriyati xaridor va sotuvchilarni ushbu shaxslarga aldanib qolmaslikka chaqirmoqda.
Avvalroq, ushbu bozorda 100 nafar “saygak”ning faoliyatiga chek qo‘yilgandi.
IIBBga ko‘ra, bunday vositachilar faoliyati sifatsiz mahsulotlar savdosining ko‘payishiga, narxlarning sun’iy oshishiga hamda xaridorlarning bozorga bo‘lgan ishonchi pasayishiga sabab bo‘lmoqda.
Shuningdek, 2025-yil va 2026-yilning o‘tgan davri davomida mazkur bozor hududida noqonuniy harakatlar bilan bog‘liq qariyb 10 ta jinoyat ishi aniqlangan.
