Eron bilan kelishuv 2 hafta ichida yakunlanishi mumkin — Tramp
AQSH prezidentining ta'kidlashicha, Vashington va Tehron yadroviy kelishuv bo‘yicha yakuniy bosqichga yaqinlashgan.
AQSh prezidenti Donald Tramp Eron bilan olib borilayotgan muzokaralar ikki hafta ichida yakunlanishi va tomonlar o‘rtasida yakuniy kelishuvga erishilishi mumkinligini ma’lum qildi. Bu haqda CNN xabar berdi.
Trampning aytishicha, hozirda AQSh va Eron o‘rtasida muzokaralar davom etmoqda va Tehron “yadroviy quroldan voz kechishga” hamda keng ko‘lamli kelishuv doirasida AQSh bilan hamkorlik qilishga tayyorlik bildirmoqda.
“Menimcha, biz bu jarayonda ustunlikka erishmoqdamiz. Keyingi ikki hafta ichida to‘liq g‘alabani e’lon qilishimiz mumkin. Bu juda tez sodir bo‘ladi va natijada neft narxlari ham pasayadi”, — deya ta'kidlagan AQSh prezidenti.
Uning ta’kidlashicha, Eron tomoni kelishuvga erishishga intilmoqda, biroq jarayonning cho‘zilishiga ularning “qat’iy va mag‘rur pozitsiyasi” sabab bo‘lmoqda.
“Ular faxrlanishadi, ayrim qarorlarni qabul qilishga shoshilmayapti, lekin oxir-oqibat bunga majbur bo‘lishadi”, — degan Tramp.
Shuningdek, AQSh prezidenti avvalroq kelishuvga erishilgan taqdirda ham Eronning yuqori darajada boyitilgan uran zaxiralari nazoratga olinishi va yo‘q qilinishi mumkinligini bildirgan edi.
