Mudofaa tizimi xodimlarining maoshi 70 foizgacha oshiriladi
Shuningdek, Havo hujumidan mudofaa qo‘shinlari va Harbiy havo kuchlari negizida Harbiy-havo kuchlari jangovar qo‘mondonligi tashkil etiladi.
O‘zbekistonda havo hujumidan mudofaa tizimlari, yuqori aniqlikdagi qurollar hamda harbiy aviatsiyani samarali qo‘llashga qaratilgan yangi islohotlar amalga oshiriladi. Bu haqda Mudofaa vaziri Shuhrat Xolmuhammedov ma’lum qildi.
Qayd etilishicha, Prezident tomonidan 8-iyun kuni imzolangan farmonga muvofiq, Havo hujumidan mudofaa qo‘shinlari va Harbiy havo kuchlari qo‘mondonligi negizida Harbiy-havo kuchlari jangovar qo‘mondonligi tashkil etiladi.
Mazkur qaror harbiy aviatsiya imkoniyatlarini yanada kengaytirish, qo‘shinlarning jangovar shayligini oshirish hamda zamonaviy tahdidlarga tezkor javob qaytarish tizimini takomillashtirishga qaratilgan.
Farmon bilan yuqori aniqlikdagi qurollar bilan jihozlangan aviatsiya texnikalari, uchuvchisiz aviatsiya komplekslari va zamonaviy harbiy vositalar bilan qurollangan yangi bo‘linmalarni tashkil etish bo‘yicha aniq vazifalar belgilangan.
Shuningdek, hujjatda harbiy xizmatchilar va mudofaa ishlari organlari fuqaro xodimlarining ijtimoiy himoyasini kuchaytirish choralari ham nazarda tutilgan. Jumladan, Toshkent va Samarqand shaharlarida xizmat qilayotgan harbiy xizmatchilarga turar joy ijarasi uchun to‘lanadigan pul kompensatsiyasi 25 foizga oshiriladi.
Bundan tashqari, mudofaa ishlari organlari fuqaro xodimlarining ish haqi 2026-yil 1-iyuldan 20 foizga, 2027-yil 1-yanvardan esa qo‘shimcha ravishda yana 50 foizga oshirilishi belgilandi.
