Toshkent xalqaro investitsiya forumiga 99 ta mamlakatdan 8 mingdan ziyod ishtirokchi kelishi kutilmoqda
Prezident Shavkat Mirziyoyevga 16-18 iyun kunlari o‘tkaziladigan beshinchi Toshkent xalqaro investitsiya forumiga tayyorgarlik yuzasidan ma'lumot berildi.
Prezident Shavkat Mirziyoyevga navbatdagi Toshkent xalqaro investitsiya forumiga tayyorgarlik ishlari yuzasidan axborot berildi.
Qayd etilishicha, mazkur forum O‘zbekistonning investitsiyaviy salohiyatini namoyish etish, xorijiy hamkorlar bilan o‘zaro manfaatli loyihalarni shakllantirish va ilgari surish uchun muhim xalqaro maydonga aylangan.
Ma’lumotlarga ko‘ra, 2022-yilda ilk bor o‘tkazilgan forumda 56 davlatdan mingdan ortiq xorijiy mehmon qatnashgan. Joriy yilning 16–18-iyun kunlari bo‘lib o‘tadigan beshinchi Toshkent xalqaro investitsiya forumida esa 99 davlatdan 8 mingdan ziyod ishtirokchi, jumladan, qariyb 3,1 ming nafar xorijiy mehmon qatnashishi kutilmoqda.
Forumda xorijiy davlatlar hukumatlari rahbarlari va vakillari, nufuzli xalqaro moliya institutlari, yirik kompaniyalar, investitsiya jamg‘armalari hamda ishbilarmon doiralar vakillari qatnashadi.
Tadbir dasturidan yalpi majlis, ikki tomonlama uchrashuvlar, tarmoq va hududlar taqdimotlari, investitsiya bitimlarini imzolash marosimlari hamda biznes muloqotlari o‘rin olgan.
Shuningdek, O‘zbekistonning investitsiyaviy salohiyatiga bag‘ishlangan ko‘rgazmada qishloq xo‘jaligi, yengil sanoat, geologiya, elektrotexnika, mashinasozlik, kimyo sanoati, energetika, sun’iy intellekt va axborot texnologiyalari sohalarining imkoniyatlari namoyish etilishi rejalashtirilgan.
Forum doirasida Prezident huzuridagi Xorijiy investorlar kengashining navbatdagi yalpi majlisi ham o‘tkaziladi. Unda mamlakatdagi investitsiya muhitini yanada yaxshilash, sanoat-texnologik va innovatsion rivojlanishni jadallashtirish, xususiy sektor hamda xalqaro investorlar uchun qulay sharoitlarni kengaytirish masalalari muhokama qilinadi.
Joriy yilgi forum yakunlari bo‘yicha ham yirik investitsiya kelishuvlari paketini imzolash rejalashtirilgan. Hozirda yangi loyihalarni shakllantirish ishlari davom etmoqda.
Ishlab chiqilayotgan kelishuvlar kimyo sanoati, geologiya va metallurgiya, yengil sanoat, elektrotexnika va mashinasozlik, farmatsevtika, qishloq xo‘jaligi, qurilish materiallari, energetika va ekologiya, raqamli texnologiyalar, qurilish va infratuzilma, bank-moliya, transport-logistika, turizm hamda ta’lim kabi yo‘nalishlarni qamrab oladi.
Ta’kidlanishicha, ushbu loyihalar yangi ish o‘rinlarini yaratish, yuqori qo‘shilgan qiymatli mahsulotlar ishlab chiqarish, eksport salohiyatini oshirish, infratuzilmani modernizatsiya qilish hamda hududlarning investitsiyaviy jozibadorligini kuchaytirishga xizmat qiladi.
Davlat rahbari forumni yuqori tashkiliy darajada o‘tkazish, har bir tarmoq va hududning investitsiyaviy salohiyatini aniq loyihalar orqali namoyon etish muhimligini qayd etdi.
Shuningdek, mutasaddilarga xorijiy mehmonlarni kutib olish, tadbirlar dasturini puxta tashkil etish, imzolanadigan kelishuvlarning aniq ijro mexanizmlarini belgilash va ularning bajarilishini forumdan keyin tizimli monitoring qilib borish bo‘yicha topshiriqlar berildi.
