Toshkentda soliq inspeksiyasi xodimlariga nisbatan jinoyat ishi qo‘zg‘atildi
2 nafar inspektor tadbirkordan noqonuniy tarzda savdo do‘konini ijaraga olishda yordam berish evaziga 5 ming AQSH dollari talab qilgan.
Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari hamkorligida tezkor tadbir davomida Yunusobod tumani Soliq inspeksiyasida faoliyat yuritgan 2 nafar inspektor o‘zaro til biriktirgan holda xizmat mavqeidan foydalanib, tadbirkorga “Chilonzor buyum bozori kompleksi” AJdan 3 ta savdo do‘konini ijaraga olishda yordam berishni va’da qilgani aniqlangan. Bu haqda DXX Zamon.uz'ga xabar berdi.
Ular, shuningdek, o‘z tanishlari orqali tadbirkorga tegishli MCHJni ochiq savdo tenderida g‘olib bo‘lishini ta’minlash hamda do‘konlarni ijaraga olish bo‘yicha shartnomalarni rasmiylashtirib berish evaziga 5 ming AQSH dollari talab qilgan.
O‘tkazilgan tezkor tadbir davomida soliq inspektorlari so‘ralgan pul mablag‘ini olgan vaqtida ashyoviy dalillar bilan qo‘lga olingan.
Hozirda mazkur shaxslarga nisbatan jinoyat ishi qo‘zg‘atilib, tergov harakatlari olib borilmoqda.
Avvalroq, Bektemir tumani soliq inspeksiyasining sho‘ba boshlig‘i mahalliy tadbirkorga tegishli savdo do‘konida xaridorga savdo cheki berilmagani yuzasidan keib tushgan murojaat yuzasidan ma’muriy bayonnoma rasmiylashtirmaslik hamda ishni sudga yubormaslik evaziga 4 million so‘m pora talab qilgani xabar qilingan edi.
