Barcha o‘zbekistonliklarning biz bilan faxrlanishini istaymiz — Fabio Kannavaro
Italiyalik mutaxassis mundial oldidan o‘z fikrlari bilan o‘rtoqlashdi.
2026-yil 10 iyun kuni O‘zbekiston milliy terma jamoasi Jahon chempionati vaqtida o‘z qarorgohi bo‘ladigan AQSHning Atlanta shahriga yetib keldi. Jamoa bosh murabbiyi Fabio Kannavaro mundialda ishtirok etish har bir futbolchi uchun alohida ahamiyatga ega ekanini ta’kidladi.
“Jahon chempionatida qatnashish — har bir futbolchining eng katta orzularidan biri. Biz maydonda bor kuchimizni beramiz, har bir bahsda oxirgi soniyagacha kurashamiz. Maqsadimiz — nafaqat yaxshi natija ko‘rsatish, balki dunyoning qayerida bo‘lishidan qat’i nazar, barcha o‘zbekistonliklarning biz bilan faxrlanishiga erishish", — dedi Kannavaro.
Ma’lumot o‘rnida, O‘zbekiston milliy terma jamoasi mundialdagi ilk yurishini 18 iyun kuni Kolumbiya milliy terma jamoasiga qarshi o‘tkazadi.
Eslatib o‘tamiz, avvalroq terma jamoa yetakchisi Jaloliddin Masharipov jarohat sabab Jahon chempionatini o‘tkazib yuborishi mumkinligi haqida xabar berilgandi.
