Diniy- ma’rifiy yo‘nalish talabalari uchun “Islom ma’rifati” stipendiyasi joriy etiladi

Prezident Shavkat Mirziyoyev O‘zbekistondagi Islom sivilizatsiyasi markazi faoliyatini yanada rivojlantirish rejalari yuzasidan taqdimot bilan tanishdi.

 

Taqdimotda markazning ilmiy-tadqiqot va ma’rifiy faoliyatini yangi bosqichga olib chiqish bo‘yicha qator tashabbuslar ko‘rib chiqildi. Jumladan, diniy-ma’rifiy yo‘nalishda tahsil olayotgan magistr va doktorantlar uchun “Islom ma’rifati” stipendiyasini joriy etish rejalashtirilgani ma’lum qilindi.

 

Shuningdek, markaz ilmiy jurnalini xalqaro Scopus va Web of Science bazalariga kiritish, ilmiy markazlarning yagona integratsiyalashgan platformasini yaratish hamda qo‘lyozmalarning raqamli katalogini tayyorlash rejalashtirilgan.

 

Madaniy merosni qaytarish yo‘nalishida dunyo auksionlari, muzeylari va xususiy kolleksiyalarida saqlanayotgan O‘zbekistonga oid noyob artefaktlarni aniqlash va Vatanga qaytarish bo‘yicha doimiy mexanizm yaratish masalasi ham muhokama qilindi.

 

Bundan tashqari, “Islom sivilizatsiyasi: tinchlik, bag‘rikenglik va ilm-ma’rifat yo‘li” mavzusida I xalqaro Islom forumini o‘tkazish, BMT va UNESCO tuzilmalarida Islom sivilizatsiyasi markazi hamda Imom Buxoriy, Imom Moturidiy va Imom Termiziy ilmiy merosiga bag‘ishlangan maxsus taqdimotlar tashkil etish rejalashtirilmoqda.

 

Markaz taqdimotlarini 55 ta davlatda tashkil etish, “Islomda ayollarning o‘rni” mavzusida xalqaro konferensiya va ko‘rgazma o‘tkazish, Oksford islom tadqiqotlari markazi, ICESCO, IRCICA, TURKSOY va boshqa xalqaro tashkilotlar bilan qo‘shma ilmiy-ma’rifiy loyihalarni amalga oshirishga ko‘rsatma berildi.

 

Xorijiy jurnalistlar va xalqaro media tuzilmalar bilan hamkorlikni kuchaytirish maqsadida press-turlar, xalqaro media klublar va media anjumanlar tashkil etiladi. Markaz brendini global miqyosda mustahkamlash uchun fotoko‘rgazmalar, tematik taqdimotlar hamda xorijdagi diplomatik vakolatxonalarda davra suhbatlari o‘tkaziladi.

 

Shuningdek, Imom Buxoriy yodgorlik majmuasiga keluvchi ziyoratchi va sayyohlar uchun yanada qulay sharoitlar yaratish, tashriflarni tartibli va mazmunli tashkil etish, ularga axborot va gid xizmatlarini ko‘rsatishni takomillashtirish masalalari ko‘rib chiqildi.

 

Ma’lumotlarga ko‘ra, joriy yil mart oyida faoliyat boshlagan Islom sivilizatsiyasi markaziga 1-iyun holatiga ko‘ra 500 mingga yaqin mahalliy va xorijiy mehmon tashrif buyurgan.

 

Prezident markaz xalqimizning boy madaniy merosi va ma’rifatparvarlik an’analarini dunyoga namoyish etuvchi nufuzli maskanga aylanishi zarurligini ta’kidlab, mutasaddilarga tegishli topshiriqlar berdi.