Eronda 20 ming kishi suvsiz qoldi

 

AQShning Eron hududiga bergan zarbalari oqibatida Hormozgon viloyatida kamida 20 ming kishi ichimlik suvi ta’minotisiz qoldi. Bu haqda viloyat suv ta’minoti va sanitariya kompaniyasi bosh direktori Hamza Purga tayanib Fars ma'lum qildi.

 

Uning so‘zlariga ko‘ra, Kuhestak shahri hamda Bamani hududidagi 10 ta qishloqni ichimlik suvi bilan ta’minlab kelgan infratuzilma obyektlari hujumlar natijasida vayron bo‘lgan. Xususan, sig‘imi 500 va 2000 kub metr bo‘lgan ikkita beton suv ombori jiddiy zarar ko‘rgan.

 

“20 ming nafarga yaqin aholiga xizmat ko‘rsatib kelgan ichimlik suvi taqsimlash tizimi AQSh hujumlari natijasida ishdan chiqdi”, — dya ta'kidlagan Hamza Pur.

 

Ma’lum qilinishicha, hodisadan so‘ng qator qishloqlarda suv ta’minoti to‘xtagan. Hozirda mahalliy hokimiyat va mas’ul tashkilotlar aholini muqobil manbalar orqali suv bilan ta’minlash choralarini ko‘rmoqda.

 

Eron OAVlari avvalroq AQSh tomonidan Hormozgon viloyatining Sirik shahri hududidagi suv infratuzilmasiga zarbalar berilgani haqida xabar qilgan edi. Hujumlar oqibatida ayrim telekommunikatsiya obyektlari ham zarar ko‘rgani bildirilgan.

 

AQSh Markaziy qo‘mondonligi ma’lumotlariga ko‘ra, zarbalar Hormuz bo‘g‘ozi yaqinida AQShning AH-64 Apache vertolyoti yo‘q qilingani ortidan amalga oshirilgan. Shundan so‘ng Eron tomoni Yaqin Sharqdagi ayrim AQSh harbiy obyektlariga javob zarbalari berganini ma’lum qilgan.