Netanyaxu yana bosh vazirlik uchun nomzodini qo‘yadi

Isroil bosh vaziri Benjamin Netanyaxu joriy yilda bo‘lib o‘tadigan parlament saylovlarida qayta nomzodini qo‘yadi. Bu haqda uning Likud partiyasiga tayanib, Reuters xabar berdi.

 

Partiya bayonotida Netanyaxuning saylovlarda ishtirok etishi va g‘alaba qozonishiga umid bildirilgan. Saylov sanasi hali rasman e’lon qilinmagan bo‘lsa-da, qonunchilikka ko‘ra, ovoz berish oktyabr oyigacha o‘tkazilishi kerak.

 

Likudning bayonoti AQSh prezidenti Donald Trampning Netanyaxuning yana saylovlarda qatnashish-qatnashmasligiga ishonchi komil emasligini bildirganidan so‘ng e’lon qilindi. 

 

Bo‘lajak saylovlar 2023-yil 7-oktabrda HAMAS tomonidan uyushtirilgan hujumdan keyingi ilk parlament saylovlari bo‘ladi. Ushbu hujum Isroil tarixidagi eng yirik xavfsizlik inqirozlaridan biri sifatida baholanadi va G‘azo sektoridagi urushga sabab bo‘lgan.

 

2022-yil dekabrida hokimiyatga qaytgan Netanyaxu faoliyati davomida hukumatga qarshi ommaviy norozilik namoyishlari hamda G‘azo, Livan va Eron bilan bog‘liq mojarolar fonida faoliyat yuritdi.

 

So‘nggi ijtimoiy so‘rovlar Netanyaxuning hukmron koalitsiyasi keyingi saylovlarda parlamentda ko‘pchilik o‘rinni qo‘lga kirita olmasligini ko‘rsatmoqda. 

 

Isroil Demokratiya Instituti tomonidan 9-iyun kuni e’lon qilingan so‘rov natijalariga ko‘ra, respondentlarning 61 foizi Netanyaxu qayta saylovlarda qatnashmasligi kerak deb hisoblaydi.

 

Shu bilan birga, so‘rovlar muxolifat partiyalari ham arab partiyalari bilan ittifoq tuzmasdan turib parlamentda ko‘pchilikni shakllantira olmasligini ko‘rsatmoqda.

 

AQSh va Isroil rasmiylariga ko‘ra, Tramp va Netanyaxu o‘rtasidagi yaqin munosabatlar saqlanib qolayotgan bo‘lsa-da, ayrim masalalarda kelishmovchiliklar ham kuzatilgan. Jumladan, Tramp so‘nggi haftalarda Isroilni Livandagi harbiy harakatlarni cheklashga chaqirgan edi.

 

Shuningdek, u Netanyaxuga nisbatan ilgari surilgan korrupsiya ayblovlari bo‘yicha Isroil prezidentini uni afv etishga bir necha bor da’vat qilgan.