O‘zbekistonda Janubiy Koreyaga ish va o‘qishga yuborishni va’da qilgan firibgarlar ushlandi
Yettita hududda o‘tkazilgan reydlarda migratsiya bilan bog‘liq firibgarlik sxemalariga chek qo‘yildi.
O‘zbekistonda fuqarolarni Janubiy Koreyaga ishga va o‘qishga yuborishni va’da qilib, ulardan pul undirish bilan shug‘ullangan bir necha shaxslar qo‘lga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti ma’lum qildi.
Qayd etilishicha, tezkor tadbirlar Qoraqalpog‘iston Respublikasi, Farg‘ona, Samarqand, Andijon, Sirdaryo va Navoiy viloyatlarida o‘tkazilgan.
Xususan, Xo‘jayli tumanida fuqaro A. R. go‘yoki yuqori lavozimli tanishlari orqali bir fuqaroni 10 250 AQSH dollari evaziga Janubiy Koreyaga ishga yuborishini va’da qilib, kelishilgan mablag‘ning 5 ming dollarini olayotgan vaqtida ushlangan.
Farg‘ona viloyatida esa muqaddam sudlangan fuqaro D. R. 10 nafar fuqaroni 55 ming AQSH dollari evaziga Koreyaga o‘qish va ishga yuborishni va’da qilib, 4 ming dollar olgan vaqtida qo‘lga olindi. Tergovga qadar tekshiruv davomida uning yana 46 nafar fuqarodan jami 196 ming 650 AQSH dollarini firibgarlik yo‘li bilan qo‘lga kiritgani aniqlangan.
Samarqand viloyatida fuqaro J. X. ikki nafar fuqaroga Koreya uchun ishchi vizasi rasmiylashtirib berishni va’da qilib, 12 ming dollar evaziga kelishilgan mablag‘ning 3 ming dollarini olayotgan vaqtda ushlangan.
Andijon viloyatining Oltinko‘l tumanida fuqaro M. O. bir fuqaroga Koreyaga ketish uchun ishchi viza olib berishni va’da qilib, 6 ming dollardan 3 ming dollarini olayotgan vaqtida qo‘lga olingan.
Sirdaryo viloyatida fuqaro N. T. migratsiya tizimida ishlovchi tanishlari orqali fuqaroni Koreyaga ishga yuborishni va’da qilib, 1 900 AQSH dollari hamda 1,2 million so‘m olayotgan vaqtida ushlandi. Yana bir holatda esa muqaddam sudlangan fuqaro Sh. B. sport vizasi orqali Koreyaga ishga yuborishni va’da qilib, 1 300 AQSH dollari va 2,4 million so‘m olayotgan vaqtida qo‘lga olingan.
Navoiy viloyatining Konimex tumanida fuqaro A. I. migratsiya tizimidagi tanishlari orqali fuqaroni Koreyaga ishga yuborishni va’da qilib, 1 ming AQSH dollari olgan vaqtida ushlangan.
Shuningdek, Farg‘ona viloyatida fuqaro A.T. ikki nafar fuqaroni 9 600 AQSH dollari evaziga Koreyaga o‘qishga yuborishni va’da qilgan. Tezkor tadbir davomida ushbu mablag‘ning 600 AQSH dollari oldindan olingan vaqtida holat fosh etilgan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
