Sirdaryoda chiyabo‘ri to‘rt fuqaroga hujum qildi
Hodisa yuzasidan tegishli tashkilotlar tomonidan o‘rganish ishlari olib borilmoqda.
Sirdaryo viloyatining Guliston tumanida chiyabo‘ri hujumi oqibatida to‘rt nafar fuqaro jarohat oldi. Bu haqda viloyat hokimligi matbuot xizmati ma’lum qildi.
Qayd etilishicha, hodisa 9-iyun kuni soat taxminan 17:30 da Guliston tumanining “Ishonch” mahallasi dala chetiga yaqin hududida sodir bo‘lgan. Yovvoyi hayvon to‘rt nafar fuqaroga hujum qilgan.
Hodisa vaqtida mahallada yashovchi fuqarolardan biri tomonidan tezkor choralar ko‘rilib, chiyabo‘ri zararsizlantirilgan va mavjud xavf bartaraf etilgan.
Jarohatlangan fuqarolarga zudlik bilan tibbiy yordam ko‘rsatilgan. Hozirda ular shifokorlar nazorati ostida bo‘lib, salomatlik holati qoniqarli ekani bildirilmoqda.
Mazkur holat yuzasidan tegishli tashkilotlar tomonidan o‘rganish va profilaktik tadbirlar olib borilmoqda. Vaziyat mutasaddi idoralar nazoratiga olingan.
