Toshkentdagi “Chinor” metro bekati 50 kunga yopiladi

 

Toshkent metropolitenining “Chinor” metro bekatida yo‘lovchilar uchun yanada qulay va zamonaviy infratuzilma yaratish maqsadida rekonstruksiya ishlari amalga oshiriladi. Bu haqda “Toshkent metropoliteni” axborot xizmati ma’lum qildi.

 

Ma’lum qilinishicha, loyiha O‘zbekiston Respublikasi Vazirlar Mahkamasida 2026-yil 30-aprel kuni o‘tkazilgan 25-son yig‘ilish bayonnomasi ijrosi doirasida amalga oshirilmoqda.

 

Rekonstruksiya doirasida bekatning kirish va chiqish qismlari kengaytiriladi, yoshi ulug‘ fuqarolar, nogironligi bo‘lgan shaxslar hamda bolali oilalar uchun 4 ta katta sig‘imli zamonaviy lift o‘rnatiladi. Shuningdek, yo‘lovchilarga xizmat ko‘rsatish sifatini oshirish maqsadida qo‘shimcha 12 ta turniket o‘rnatilishi rejalashtirilgan.

 

Shu munosabat bilan, joriy yilning 13-iyunidan boshlab “Chinor” metro bekati 50 kun muddatga vaqtincha yo‘lovchilar uchun yopiladi.

 

Yo‘lovchilarga qulaylik yaratish maqsadida “Chinor” va “Yangihayot” metro bekatlari o‘rtasida maxsus metrobuslar qatnovi yo‘lga qo‘yiladi. Metrobuslar belgilangan jadval asosida harakatlanib, yo‘lovchilarning manzillariga o‘z vaqtida yetib borishiga xizmat qiladi.

 

“Toshkent metropoliteni” yuzaga kelishi mumkin bo‘lgan vaqtinchalik noqulayliklar uchun uzr so‘rab, amalga oshirilayotgan ishlar metro infratuzilmasini yanada takomillashtirish va yo‘lovchilar uchun zamonaviy sharoitlar yaratishga qaratilganini ta’kidladi.