O‘zbekistonda bolalarga transport vositasini boshqarishga berganlarga javobgarlik kuchaytiriladi
Voyaga yetmagan shaxslarning transport vositasini boshqarishi oqibatida yo‘llarda o‘lim va og‘ir jarohatlar bilan bog‘liq hodisalar kuzatilayotgani qayd etildi.
Prezident Shavkat Mirziyoyev aholi salomatligi va millat genofondini giyohvandlikdan himoya qilish, shuningdek, yo‘l harakati ishtirokchilari xavfsizligini ta’minlashga qaratilgan qonunchilikni takomillashtirish masalalari yuzasidan taqdimot bilan tanishdi.
Taqdimot davomida giyohvandlik va narkojinoyatlarga qarshi kurashish tizimini zamon talablariga mos ravishda takomillashtirish, yoshlar orasida ushbu illatning tarqalishining oldini olish hamda bu boradagi profilaktik choralarni kuchaytirish masalalari muhokama qilindi.
Shuningdek, yo‘l-transport hodisalarining oldini olish masalalariga alohida e’tibor qaratildi. Qayd etilishicha, ayrim fuqarolar tomonidan voyaga yetmagan shaxslarga transport vositasini boshqarishga ruxsat berilayotgani oqibatida yo‘llarda o‘lim va og‘ir tan jarohatlari bilan bog‘liq holatlar yuz bermoqda.
Shu munosabat bilan yo‘l harakati qoidalariga rioya etilishini ta’minlashning yangi mexanizmlarini joriy etish, og‘ir oqibatlarga olib keluvchi avariyalarning oldini olish hamda bu boradagi javobgarlik choralarini kuchaytirish zarurligi ta’kidlandi.
Davlat rahbari giyohvandlik va narkojinoyatlarga qarshi kurashishni zamonaviy yondashuvlar asosida tashkil etish, yoshlarni ushbu illatdan himoya qilish, shuningdek, yo‘llarda inson hayoti va xavfsizligini ta’minlashga qaratilgan takliflarni ma’qulladi hamda muhokama qilingan masalalar yuzasidan mas’ul idoralarga tegishli topshiriqlar berdi.
