Samarqandda sobiq IIB xodimini ishga tiklashni va’da qilib, pul olgan profilaktika inspektori qo‘lga olindi

 

Samarqand va Namangan viloyatlarida ichki ishlar organlari xodimlarining korrupsion harakatlariga chek qo‘yildi. Bu haqda Davlat xavfsizlik xizmati Zamon.uzga ma’lum qildi.

 

Qayd etilishicha, DXXning Navoiy viloyati bo‘yicha boshqarmasi hamda Bosh prokuratura huzuridagi Departament xodimlari hamkorligida o‘tkazilgan tezkor tadbirda Samarqand shahar IIO FMB profilaktika inspektorining noqonuniy faoliyati fosh etilgan. U mansabdor tanishlari orqali sobiq ichki ishlar organi xodimini tizimga qayta ishga tiklashda yordam berishni va’da qilib, buning evaziga 7 ming AQSH dollari olgan vaqtida ashyoviy dalillar bilan qo‘lga olingan.

 

Mazkur holat yuzasidan unga nisbatan Jinoyat kodeksining 168-moddasi (firibgarlik) va 211-moddasi (pora berish) bilan jinoyat ishi qo‘zg‘atilib, tergov harakatlari olib borilmoqda.

 

Shuningdek, Namangan viloyatining Chust tumanida faoliyat yurituvchi profilaktika inspektorining ham noqonuniy harakatlari aniqlangan. U fuqaro ustidan kelib tushgan murojaatni ko‘rib chiqmasdan qoldirganini ro‘kach qilib, undan 2 ming AQSH dollari talab qilgan. Inspektor joriy yil fevral oyida ushbu mablag‘ning 700 dollarini olgan.

 

Tergov materiallariga ko‘ra, u keyinchalik fuqarodan qolgan 1 300 dollarni hamda kelgusida chorva mollarini O‘zbekiston–Qirg‘iziston davlat chegarasi orqali noqonuniy olib o‘tishda ko‘maklashish evaziga yana 2 ming dollar talab qilgan. Natijada jami 3 300 AQSH dollarini olayotgan vaqtida DXX, Bosh prokuratura huzuridagi Departament va IIV Shaxsiy xavfsizlik bosh boshqarmasi xodimlari tomonidan qo‘lga olingan.

 

Mazkur holat yuzasidan profilaktika inspektoriga nisbatan Jinoyat kodeksining 165-moddasi va 168-moddasi bilan jinoyat ishi qo‘zg‘atilib, tergov harakatlari davom ettirilmoqda.