AQSH va Eron shu hafta oxirigacha tinchlik bitimini imzolashi mumkin — Tramp
Eronning Fars agentligi ham Tehron bitimni ma’qullashi ehtimoli yuqori ekanini xabar qildi.
AQSH prezidenti Donald Tramp Qo‘shma Shtatlar va Eron o‘rtasida tinchlik bitimi shu hafta oxiridayoq imzolanishi mumkinligini ma’lum qildi. Bu haqda Reuters xabar berdi.
Trampning ta’kidlashicha, kelishuv amalga oshsa, Hormuz bo‘g‘ozi orqali xalqaro dengiz qatnovi qayta tiklanadi.
Oq uyda jurnalistlar bilan muloqot qilgan Tramp tomonlar urushni yakunlash bo‘yicha muhim kelishuvga erishganini aytdi. Prezidentning so‘zlariga ko‘ra, hujjat yaqin kunlarda, ehtimol hafta oxirida imzolanishi mumkin.
Eronning Fars agentligi ham Tehron bitimni ma’qullashi ehtimoli yuqori ekanini xabar qildi. Biroq Eron tomoni hozircha rasmiy javob bermagan.
Trampning bildirishicha, kelishuvning asosiy sharti Eronning yadroviy qurolga ega bo‘lishiga yo‘l qo‘ymaslikdan iborat. Shu bilan birga, Tehron xalqaro sanksiyalarni bekor qilish, muzlatilgan mablag‘larni qaytarish hamda Hormuz bo‘g‘ozi ustidan nazoratini tan olishni talab qilmoqda.
Reuters manbalariga ko‘ra, Eron va G‘arb vakillari o‘rtasida harbiy harakatlarni to‘xtatish bo‘yicha muzokaralar so‘nggi kunlarda jadallashgan. Eronlik manbalar siyosiy kelishuvga erishilganini, ammo ayrim masalalar yuzasidan muzokaralar davom etayotganini bildirgan.
Tramp, shuningdek, ijtimoiy tarmoqdagi sahifasida bo‘lajak bitim Eron rahbariyatining yuqori darajalari hamda Isroil, Saudiya Arabistoni, Qatar va Birlashgan Arab Amirliklari tomonidan qo‘llab-quvvatlanayotganini ta’kidladi.
Xabarlardan so‘ng AQSH fond bozorlari o‘sishni qayd etdi, neft narxlari esa pasaydi.
Eslatib o‘tamiz, AQSH va Isroilning 28-fevral kuni Eronga bergan havo zarbalaridan so‘ng boshlangan mojaro uch oydan buyon davom etmoqda. Urush oqibatida minglab odamlar halok bo‘lgan, global energiya bozorlarida esa keskin tebranishlar kuzatilgan.
